Me dy qëndrime të koordinuara brenda pak ditësh, PD ka ndryshuar qasjen e saj ndaj zgjedhjeve të 11 majit, duke hequr dorë nga kompromisi për të qenë pjesë e procesit të organizimit të zgjedhjeve. Hapi i parë ishte qëndrimi refraktar ndaj ndryshimeve të rëna dakord më parë me PS për çështjen e votës së emigrantëve. Pasi gjetën konsensus jashtë syve të publikut, tashmë PS dhe PD kanë ngecur në detajet formale që priteshin të votoheshin javën e ardhshme. Sali Berisha ka deklaruar se opozita nuk do të bashkojë votat e saj me PS-në nëse nuk plotësohen kërkesat e PD-së, gjë që mesa duket do ta çojë në kolaps dhe ta bëjë të pazgjidhshme teknikisht mundësinë e votimit të diasporës.
Ndërkaq sot, Ivi Kaso, në emër të PD-së, ka kontestuar dhe votimin elektronik. “Për Partinë Demokratike, pajisjet për votim e bëjnë të pabesueshëm procesin zgjedhor, ndaj më 11 maj nuk mund të ketë votim dhe numërim elektronik” – deklaroi sot në një konferencë për shtyp Ivi Kaso, duke shënuar hapin e dytë të demokratëve drejt kontestimit të procesit zgjedhor.
Është ende e paqartë pse PD, gati 3 muaj para zgjedhjeve, nxjerr pretendime të tilla për çështje teknike të cilat mund dhe duhet të ishin zgjidhur kohë më parë. Sali Berisha dhe PD kanë në krye të KQZ-së Celibashin, personazh që haptas ka mbështetur këtë grupim në pretendimet teknike për proceset zgjedhore. Për më tepër nënkomisionerja, Lealba Pelinku mbështetëse publike e Sali Berishës ka vetëm një detyrë me ligj - të organizojë dhe zbatojë votimin elektronik, ndaj PD i ka te gjitha garancitë për këtë.
Një mundësi është ajo e kërkesës për shtyrjen e zgjedhjeve. Demokratët janë të bindur se me administratën e re do të mund të heqin “non grata”-n për Sali Berishën dhe familjen e tij, e ndoshta deri në vjeshtë kanë shpresë se mund ta realizojnë këtë. Se sa mund të ndodhë në të vërtetë kjo, mbetet për t’u parë, pasi spekulimet për tema të tilla kanë qenë gjithmonë prezente në politikën shqiptare. Ajo që mbetet është qëndrimi që do të mbajë Edi Rama dhe mazhoranca për pretendimet e PD-së dhe qasjen e re për shtyrjen e mundshme të ditës së zgjedhjeve. Një situatë e ngjashme ishte ajo që ndodhi në zgjedhjet e vitit 2017, kur pas shumë presionesh PD hyri në qeveri me Edi Ramën dhe arriti të shtyjë ditën e zgjedhjeve. Edhe pse rezultati doli ai që të gjithë e dinë.
