Selia e Partisë Socialiste ka filluar të ziejë nga ethet e fushatës elektorale për zgjedhjet parlamentare të vitit 2025. Pas lëvizjeve të fundit në qarkun më të madh të vendit, Tiranës, të drejtuesve politikë, me ardhjen e Blendi Gonxhes, duket se edhe në qarqe të tjera do ketë ndryshime. Kështu, Blendi Klosi pritet të jetë drejtues politik në Dibër. Klosi, një figurë e rëndësishme brenda të majtëve, do të ketë përgjegjësinë për menaxhimin e fushatës në këtë qark, ndërkohë që Gonxhja do të fokusohet në zonën e Kombinatit në kryeqytet. Më herët z.Klosi ka drejtuar fushatën e socialistëve në qarkun e Vlorës, aktualisht ai mban postin e Sekretarit të Përgjithshëm në selinë rozë. Fjalët për mundësinë e një mase nga SPAK për kryetarin e bashkisë së Tiranës, Erion Veliaj, duket se kanë trazuar ujrat në selinë rozë. Madje, në Tiranë prej ditësh Erion Veliaj nuk është shfaqur në takime elektorale në qarkun e Tiranës ku është drejtues politik i PS bashkë me Elisa Spiropalin dhe Ogerta Manastirliun.
