Sekretari i Përgjithshëm i Partisë së Lirisë, Tedi Blushi, ka bërë thirrje për një protestë masive më 6 dhjetor, ora 12:00, para Prokurorisë së Posaçme (SPAK). Gjatë një deklarate në protestën e mbajtur sot përpara Bashkisë së Tiranës, Blushi theksoi se SPAK është kthyer në mbrojtës të qeverisë dhe bashkisë.
“Kjo është e vetmja ditë në javë kur kryebashkiaku nuk ka mundësi të vjedhë, sepse nga frika e protestës e braktis këtë godinë,” u shpreh Blushi. Ai akuzoi SPAK-un si një “patericë” të pushtetit të Edi Ramës dhe Erion Veliajt, duke shtuar se ky institucion është bërë pjesë e krimeve të tyre.
Blushi ftoi qytetarët të bashkohen në protestën e së enjtes, duke deklaruar se qëllimi nuk është vetëm kërkimi i drejtësisë, por denoncimi i një sistemi drejtësie që, sipas tij, është kthyer në bashkëpunëtor të krimit.
“Të mblidhemi për të treguar se qytetarët nuk pranojnë më që SPAK të jetë partner në krim i kësaj narkoqeverie dhe narkobashkie,” përfundoi Blushi.
Protesta pritet të përqendrohet në kërkesat për llogaridhënie dhe drejtësi të barabartë për të gjithë.
