Rikthimin e tij në Parlament, kreu i Partisë Demokratike, Sali Berisha e shfrytëzoi për të lëshuar akuza të shumta. Nga foltorja e Kuvendit ai tha se ky do të jetë rikthimi i tretë dhe i vërtetë. Me të mbaruar fjalën në seancën parlamentare, foli edhe për mediat, dhe tha se kjo qeveri është e "shfrenuar" në luks e mirëqenie nga parfumet mijëra euroshe e jeta e luksit që bëjnë. "Pra, këta janë njerëz që nuk dëgjojnë as zërin e Zotit, as të xhamisë, as të kishës, janë të verbuar nga luksi, janë një grup bixhozxhinjsh që kanë shuma parash në kazino dhe nuk duan t’ia dinë për pensionistët. Aty bëhet një gërshetim parash, parfumesh sikur je në sallon mode dhe jo në një sallë parlamenti, nuk do t'ia dijë Rama kur blen oborrin 4 milionë euro ku shpenzon 20 milionë euro me Ismailin e famshëm, me ministrat që ulen për të ngrënë biftek me 1 mijë euro. Shpenzojnë për qerpikë artificialë 150 euro në javë. Luksi i tepruar është haram në të gjitha besimet", tha Berisha.
