Kreu i grupit parlamentar të Partisë Demokratike, Gazment Bardhi, ka akuzuar mazhorancën dhe Kryetaren e Kuvendit, duke pretenduar shkelje të Kushtetutës dhe përjashtim të opozitës nga procesi i konsultimit me Komisionin e Venecias mbi çështjen e mandatit të ish-ministres Olta Xhaçka.
Bardhi theksoi se drafti i opinionit të Komisionit të Venecias i është komunikuar vetëm deputetëve të Partisë Socialiste, duke përjashtuar tre grupet e opozitës nga mundësia për të dhënë komentet e tyre.
“Drafti iu është paraqitur ju zyrtarisht dhe, në shkelje flagrante të pozicionit tuaj, e keni ndarë vetëm me Grupin e PS-së. Ndërkohë, tre grupet e opozitës nuk janë vënë në dijeni, duke mos pasur mundësi të japin komentet përpara diskutimeve. Ju mund të mos i pëlqeni ato komente, ndaj e keni mbajtur të fshehur,” tha Bardhi.
Po ashtu, ai kritikoi përbërjen e delegacionit parlamentar që përfaqëson Shqipërinë në Komisionin e Venecias, duke theksuar se për herë të parë është i përbërë vetëm nga deputetë të mazhorancës.
“Për herë të parë në historinë e Kuvendit, delegacioni përbëhet vetëm nga deputetë të mazhorancës. Kjo nuk ka ndodhur kurrë më parë, sepse gjithmonë ka pasur përfaqësim të balancuar mes mazhorancës dhe opozitës. A jemi shpallur armiq të popullit nga partia në pushtet? A po synoni ta shpallni Shqipërinë njëpartiake?” pyeti Bardhi.
Spiropali: “S’ka asnjë dokument zyrtar nga Komisioni i Venecias”
Ministrja për Marrëdhëniet me Parlamentin, Elisa Spiropali, i hodhi poshtë akuzat e Bardhit, duke mohuar ekzistencën e një drafti zyrtar nga Komisioni i Venecias.
“Nuk ka asnjë draft për të ndarë. Kur të vijë një dokument zyrtar, ai do të ndahet me të gjitha grupet,” tha Spiropali, duke e cilësuar akuzën si spekulim.
