Sali Berisha ka marrë sot përsipër të klasifikojë dhe çmimet e çantave të luksit që, sipas tij, përdorin ministret e Ramës. Kryetari i opozitës, katër muaj para zgjedhjeve parlamentare, u tha shqiptarëve se një çantë Christian Dior nuk është më e kushtueshme se një Hermès. Madje, ai klasifikoi si më të shtrenjtat çantat Birkin, Bottega Veneta, dhe Louis Vuitton. I këshilluar ndoshta nga nusja e djalit, që njihet si blogere me shije të shtrenjta, Sali Berisha, në moshën 80-vjeçare, u kërkoi gazetarëve t’ua fotografojnë çantat ministreve, por jo bashkëpunëtorëve dhe familjes së tij.
Është e vërtetë që çantat e shtrenjta dhe objektet e luksit janë një shenjë e abuzimit të pushtetit. Por, kur këtë e bëjnë si pozita, ashtu edhe opozita, mungon morali politik dhe njerëzor. Sali Berisha dhe familja e tij janë përdorues të sendeve të luksit, që nga vilat, makinat, çantat apo udhëtimet e shtrenjta. Jo më kot ai dhe familja e tij janë në hetim pasuror nga SPAK, ashtu si edhe familjet e disa ministrave, ish-ministrave dhe kryetarëve të bashkive. Sepse, sado të bërtasësh “kapeni hajdutin” duke fotografuar çantat e të tjerëve, më mirë është të hedhësh sytë në oborrin e vilës tënde, ku sendet e luksit trajtohen si objekte të zakonshme.
Siç thotë një fjalë e urtë: Mos godit çatinë e komshiut kur tënden e ke prej qelqi.
