Komisioni antikorrupsion, i drejtuar nga z. Fatmir Xhafaj ka kërkuar një buxhet prej 500 mijë eurosh për 81 ekspertë. Mesatarisht ky fond është sa shpërblimin prej 15 mijë lekë për 3.280 pensionistë, ose e thënë ndryshe pagesa mesatare e një eksperti është sa shpërblimi për 41 pensionistë. Nuk po hyjmë më tej analizës se sa i nevojshëm paraqitet akordimi i këtij fondi gjysmëmilionësh euro. Por kujtojmë që një pjesë e mirë e ekspertëve të atashuar Komisionit Xhafa janë punonjës të institucioneve shtetërore që paguhen nga fondet e buxhetit (pra si barrë e tatimpaguesve). Përcjellja e ekspertizës tek Komisioni Xhafa është pjesë e detyrave që kryejnë në institucionet përkatëse dhe për të cilat paguhen rregullisht. Edhe puna më së shumti do të kryhet brenda orarit zyrtar e nuk do të ketë ndonjë ngarkesë orare të konsiderueshme jashtë orarit zyrtar (pa hyrë pvrsëri në llogaritë e orëve që shpenzohen kafeneve nga këta zyrtarë). Pavarësisht objektit të Komisionit, asnjë nga këta ekspertë punonjës institucionesh shtetërore, përshi dhe institucione të pavarura që financohen po me para publike, nuk do të japë përvojë, këshillim apo mendim jashtë ekspertizës dhe detyrave funksionale që mbulojnë akgtualisht. Pra dhënia e pagave shtesë për këta ekspertë, që z.Xhafaj i kërkon në nivelet nga 2.800 euro deri në 8.000 euro e shndërron mekanizmin e pagesës së eskpertëve të shtetit në absurditet dhe forma abuzimi me paranë publike. Ekspertët janë ndarë në tre nivele pagesash: Niveli i parë (30 ekspertë): 8.000 euro (3 paga bruto të një këshilltari). Niveli i dytë (11 ekspertë): 5.600 euro (2 paga të një këshilltari). Niveli i tretë (27 persona: 15 në sekretariat dhe 12 ekspertë): 2.800 euro. Gjithashtu, parashikohet pagesë prej 5.600 eurosh për 23 “ekspertë të huaj”, të cilët janë shqiptarë nga diaspora. Kjo përfshirje reflekton një angazhim publik të Xhafajt për bashkëpunim me diasporën.
