Seanca plenare e Kuvendit u shoqërua me tensione dhe përplasje mes mazhorancës dhe opozitës, pas propozimit të Partisë Socialiste për faljen e gjobave për ndërtimet pa leje në zonat rurale. Projektligji i propozuar, i cili parashikon anulimin e këtyre gjobave, u dorëzua për shqyrtim me procedurë të përshpejtuar nga 35 deputetë të PS-së.
Deputeti i PD-së, Flamur Noka, kërkoi fjalën për të kundërshtuar këtë iniciativë, duke akuzuar mazhorancën se “po gënjen Parlamentin.” Megjithatë, fjala e tij u ndërpre, dhe pas përpjekjes për t’u drejtuar foltores, ai u përball me Gardën e Kuvendit, çka përshkallëzoi tensionet në sallë.
Kryetarja e Kuvendit, Elisa Spiropali, njoftoi se projektligji ishte dorëzuar pak minuta para nisjes së seancës dhe kërkoi pushim të shkurtër për të vënë dokumentin në dispozicion të deputetëve.
“Sekretaria më njofton se është depozituar para 45 minutash. Jepen 10 minuta pushim që propozimi të shpërndahet,” deklaroi Spiropali.
Pas rinisjes së seancës, deputetët e opozitës kundërshtuan me forcë shqyrtimin e projektligjit, duke pretenduar se nuk ishin informuar për një propozim të tillë. Deputetët e PD-së bllokuan disa herë foltoren, duke akuzuar mazhorancën për mungesë transparence dhe veprim të njëanshëm.
