Ministrja e Administratës Shtetërore dhe Vetëqeverisjes Lokale në Serbi, Snezhana Paunoviç, ka kërkuar falje pas deklaratave të saj për “spastrimin etnik të Kosovës”, por falja e saj u është drejtuar vetëm presidentit Aleksandar Vuçiç dhe kryeministrit Gjuro Macut, duke mos përfshirë shqiptarët apo familjet e prekura nga lufta në Kosovë.
Deklarata e saj ka shkaktuar reagime të forta brenda dhe jashtë Serbisë, ndërsa Paunoviç pretendoi se fjalët e saj ishin nxjerrë jashtë kontekstit dhe se në media ishte shkëputur vetëm një pjesë e shkurtër nga intervista.
Megjithatë, në intervistën e publikuar nga media përkatëse, ajo dëgjohet të deklarojë se, nëse do të ishte në vend të Sllobodan Millosheviçit në vitin 1998, do të kishte vepruar ndryshe lidhur me Kosovën, duke përmendur edhe “spastrimin etnik”.
“Ky ishte rrëfimi im personal, jo një deklaratë politike. Është e pakëndshme që duhet të shpjegoj se kjo nuk është politika e presidentit apo e qeverisë”, deklaroi Paunoviç, duke u distancuar nga përgjegjësia politike e deklaratës.
Ajo pretendoi se me deklaratën e saj kishte pasur parasysh largimin e personave që, sipas saj, nuk e konsideronin veten pjesë të Republikës Federale të Jugosllavisë, ndërsa ata që do të kryenin “veprime terroriste” do të trajtoheshin si terroristë.
Ministrja serbe e cilësoi si “paradoksal” vendimin e autoriteteve të Kosovës për ta shpallur person “non grata”, duke kritikuar ndalimin e hyrjes së saj në Kosovë dhe duke iu referuar institucioneve të Kosovës si “të përkohshme”.
