Kandidati i Partisë Përparimtare Serbe për kryeministër, Aleksandër Vuçiç, ka vijuar fushatën për zgjedhjet e parakohshme parlamentare në Serbi, duke iu drejtuar qytetarëve përmes rrjeteve sociale.
Gjatë fjalimit të tij, Vuçiç deklaroi se sheh, sipas tij, nervozizëm në rajon, duke përmendur emra të politikanëve nga Mali i Zi, Kroacia dhe Kosova.
“Po shoh nervozizëm në rajon. Zvicer, Gjukanoviç, Plenkoviç, Kurti janë nervozë. Ata do të vazhdojnë me të gjitha presionet e mundshme”, tha Vuçiç, sipas raportimit të “Nova.rs”.
Ai vijoi duke krahasuar moshën e kandidatëve të listave rivale, duke pretenduar se kandidatët e opozitës janë në total 1,075 vjet më të vjetër se kandidatët në listën e tij.
Vuçiç foli gjithashtu për atë që e cilësoi si rritje të ideologjisë naziste dhe për marrëdhëniet e vendeve të rajonit me Kosovën dhe Shqipërinë.
“Me frikë e shohin rritjen e ideologjisë naziste. Shpresoj që fqinjët tanë të mund ta kapërcejnë këtë”, tha ai, duke shtuar se Serbia do të vazhdojë të ndjekë zhvillimet në rajon.
Në vijim të fjalimit, Vuçiç iu referua edhe sloganit “Za dom spremni”, të përdorur nga regjimi ustash gjatë Luftës së Dytë Botërore.
“Që të këndojmë ‘Za dom spremni’, atë film nuk do ta shikoni në Serbi”, deklaroi ai.
Ndërkohë, Vuçiç bëri të ditur edhe se në mitingun e SNS-së në Arenën e Beogradit do të marrë pjesë si i ftuar special kryeministri i Sllovakisë, Robert Fico.
“Do të pres një mysafir të rëndësishëm, një mik të madh të Serbisë. Mysafiri im në Arenë do të jetë kryeministri i Sllovakisë, Robert Fico”, tha Vuçiç.
Zgjedhjet e parakohshme parlamentare në Serbi do të zhvillohen më 25 tetor. Vuçiç dha dorëheqjen nga posti i presidentit më 27 shtator.
