Dhomat e Specializuara të Kosovës në Hagë kanë bërë të ditur përbërjen e panelit të Gjykatës së Apelit që do të shqyrtojë çështjen ndaj ish-krerëve të Ushtrisë Çlirimtare të Kosovës, Hashim Thaçi, Kadri Veseli, Rexhep Selimi dhe Jakup Krasniqi.
Caktimi i trupit gjykues vjen pas aktgjykimit të shkallës së parë të shpallur më 16 shtator, ndaj të cilit palët kanë të drejtë të ndjekin procedurat e apelimit.
Sipas njoftimit, në panelin e Apelit janë caktuar gjyqtarët Kai Ambos, Michèle Picard dhe Nina Jørgensen, ndërsa gjyqtari rezervë është Emilio Gatti.
Paneli do të ketë në shqyrtim pretendimet e ngritura në fazën e apelimit dhe argumentet e paraqitura nga palët lidhur me vendimin e shkallës së parë.
Thaçi, Veseli, Selimi dhe Krasniqi u shpallën fajtorë në shkallën e parë për disa akuza për krime lufte, ndërsa u shpallën të pafajshëm për akuzat për krime kundër njerëzimit.
Vendimi i 16 shtatorit nuk është përfundimtar dhe procesi tashmë vijon në shkallën e Apelit.
