Deputetja e Partisë Demokratike të Kosovës, Blerta Deliu-Kodra, ka kërkuar nga Kuvendi i Kosovës miratimin e ndryshimeve në Ligjin për Dhomat e Specializuara, duke lidhur këtë çështje me zgjedhjen e presidentit të vendit.
Një ditë pasi Qeveria e Kosovës e ka rikthyer në Kuvend projektligjin e sponsorizuar nga PDK-ja, Deliu ka deklaruar se, nëse ndryshimet miratohen në dy lexime, partia e saj do t’i vërë në dispozicion 22 votat për zgjedhjen e presidentit.
Sipas saj, një votim i tillë do të mund të krijonte hapësirë për një marrëveshje politike mes forcave parlamentare dhe për shmangien e zgjedhjeve të reja. Deliu ka theksuar se Kosova ka nevojë për stabilitet politik dhe për një figurë në postin e presidentit që mund të afrojë subjektet politike.
“Në rast se do të miratohet ligji brenda dy leximeve, plotësim-ndryshimi i ligjit për Dhomat e Specializuara në Kuvend, Partia Demokratike e Kosovës do t’i ketë 22 votat në dispozicion për zgjedhjen e presidentit”, ka deklaruar Deliu.
E pyetur se cili mund të ishte kandidati që do të bashkonte LVV-në dhe PDK-në, deputetja nuk ka përmendur një emër konkret. Ajo ka thënë se presidenti duhet të jetë një figurë që afron forcat politike dhe që do të ndihmonte në shmangien e zgjedhjeve të reja parlamentare.
Deliu ka deklaruar gjithashtu se PDK-ja nuk dëshiron zgjedhje të reja, por nuk do të mbështesë, sipas saj, vendime që do ta shndërronin partinë në “zgjatim” të pushtetit të LVV-së.
Duke folur për mundësinë e zgjedhjeve të reja në nëntor, në rast se nuk gjendet një zgjidhje për zgjedhjen e presidentit, Deliu ka thënë se aktgjykimi i 16 shtatorit ndaj ish-krerëve të UÇK-së do të jetë pjesë e debatit politik dhe e fushatës zgjedhore.
Deputetja e PDK-së ka argumentuar gjithashtu se ndryshimet në Ligjin për Dhomat e Specializuara duhet të trajtohen nga Kuvendi, ndërsa ka paralajmëruar se pakënaqësia qytetare mund të rritet nëse kërkesat për ndryshimin e ligjit nuk merren parasysh.
