Kroacia ka regjistruar të ardhura rekord nga turistët e huaj gjatë gjashtë muajve të parë të vitit 2026, duke arkëtuar rreth 4.5 miliardë euro, sipas të dhënave të Bankës Kombëtare Kroate, të publikuara nga Ministria e Turizmit dhe Sportit.
Vetëm gjatë tremujorit të dytë të vitit, të ardhurat nga turistët e huaj arritën në 3.6 miliardë euro, 4 për qind më shumë krahasuar me të njëjtën periudhë të vitit 2025. Në total, për gjysmën e parë të vitit, të ardhurat u rritën me 5 për qind, ose rreth 212.4 milionë euro më shumë se në të njëjtën periudhë të vitit të kaluar.
Rritja e të ardhurave është shoqëruar edhe me një ecuri pozitive të turizmit vendas. Gjatë gjashtë muajve të parë të vitit, Kroacia regjistroi rreth 1.5 milionë ardhje dhe 4.2 milionë net-qëndrime të turistëve vendas, me rritje përkatësisht 7 dhe 6 për qind krahasuar me një vit më parë.
Ministri kroat i Turizmit dhe Sportit, Tonçi Glavina, tha se rezultatet e periudhës para sezonit lidhen me aktivitetet strategjike dhe promovuese të përshtatura me ndryshimet në treg. Sipas tij, synimi është që rritja e turizmit të mos përqendrohet vetëm në muajt e pikut, por të shtrihet gjatë gjithë vitit.
Të dhënat e ministrisë tregojnë se gjatë gjashtë muajve të parë të vitit Kroacia regjistroi gjithashtu mbi 7.6 milionë ardhje dhe 29.5 milionë net-qëndrime në total, duke ruajtur në nivele të ngjashme me vitin e kaluar aktivitetin e përgjithshëm turistik.
Glavina theksoi se krahasimi me vitin 2016 tregon një rritje prej 120 për qind të të ardhurave nga turistët e huaj, si për tremujorin e dytë, ashtu edhe për gjysmën e parë të vitit. Vetëm gjatë gjashtë muajve të parë të 2026-s, sipas ministrisë, Kroacia ka gjeneruar rreth 2.5 miliardë euro më shumë nga turistët e huaj krahasuar me të njëjtën periudhë të vitit 2016.
Rezultatet vijnë në një kohë kur autoritetet kroate po synojnë forcimin e turizmit gjatë gjithë vitit, duke u fokusuar jo vetëm te numri i vizitorëve, por edhe te rritja e shpenzimeve dhe e të ardhurave të gjeneruara nga sektori.
