Partia Demokratike e Kosovës ka kushtëzuar vazhdimin e punimeve në Kuvend me trajtimin e Projektligjit për ndryshimin dhe plotësimin e Ligjit për Dhomat e Specializuara të Kosovës.
Deputetja e PDK-së, Blerta Deliu-Kodra, deklaroi në emisionin “DPT te Fidani” në Klan Kosova se grupi parlamentar i partisë nuk do të marrë pjesë në punimet e Kuvendit për çështje të tjera, pa u sjellë dhe diskutuar më parë ligji për Dhomat e Specializuara.
“Asnjë deputet i yni nuk do të jetë në Kuvend pa e diskutuar ligjin që ne e kemi kërkuar. Është iniciativë që i përgjigjet nevojës që sot e ka Kosova”, tha Deliu-Kodra.
Ajo theksoi se nisma lidhet edhe me mbështetjen financiare dhe institucionale për ish-krerët e UÇK-së që po përballen me procesin gjyqësor në Hagë.
Sipas saj, PDK-ja ka pritur që Qeveria e Kosovës të ndërmarrë hapa konkretë dhe jo vetëm të shprehë mbështetje politike përmes deklaratave.
“Kemi pritur që së paku Qeveria, në raste si kjo, të mos e dëshmojë vetëm me një deklaratë vullnetin e saj politik, por kur cenohen themelet e shtetit, një qeveri normale do të duhej të sillej jo vetëm me seriozitet, por të dëshmonte gjithë mbështetjen”, deklaroi ajo.
Deliu-Kodra e cilësoi si prioritet çështjen e ligjit për Specialen, duke e lidhur atë me mbështetjen institucionale për ish-udhëheqësit e UÇK-së.
Deputetja e PDK-së kritikoi gjithashtu qeverinë dhe ministren e Drejtësisë, Donika Gërvalla-Schwarz, për vonesat në procedimin e projektligjit. Ajo pretendoi se procedurat për marrjen e opinioneve nga ekspertët mund të shtyjnë procesin përtej afatit të 6 tetorit.
Kjo çështje është bërë një nga temat kryesore të debatit politik në Kosovë ditët e fundit. PDK-ja ka kërkuar që projektligji të procedohet sa më shpejt në Kuvend, ndërsa më 29 shtator deputeti Përparim Gruda kërkoi që ai të dërgohet për miratim para 6 tetorit, duke argumentuar se Kuvendi mund të shpërndahet pas kësaj date.
Një ditë më parë, Deliu-Kodra i kishte bërë thirrje ministres Gërvalla që të procedonte projektligjin në Qeveri, në mënyrë që ai të kalonte më pas në Kuvend për votim. Ajo tha se 99 deputetë nga parti të ndryshme e kishin mbështetur me votë një deklaratë lidhur me luftën e UÇK-së dhe ish-krerët e saj në Hagë, duke kërkuar që ky qëndrim politik të pasohej me veprime institucionale.
