Ajo çka ndodh mes Edi Ramës dhe Erion Veliajt, përveç kostos së lartë që ka për xhepat e shqiptarëve, është padyshim dhe një telenovelë me shumë seri e diabolizmit me të cilin Rama trajton bashkëpunëtorët e tij me prangat varur në derën e zyrës.
Grija ishte ngjyra e fytyrës së Veliajt një javë më parë teksa Rama emëroi drejtuesit e qarkut të Tiranës, ku bashkë me kryetarin e bashkisë do të drejtojnë Elisa Spiropali dhe Ogerta Manastirliu. Por ndërsa u mundua ta kapërcente këtë moment të vështirë, Veliaj sërish është gjendur para Ramës që për herë të disatë është tallur me zellin e tepruar të vartësit të tij për servilizëm.
VNA mëson se gjatë mbledhjes për ndarjen e detyrave të qarkut të Tiranës për strukturat e PS, dialogu i zhvilluar mes Ramës dhe Veliajt ka qenë sa vijon:
Rama: Meqë Erioni duhet të kalojë më shumë kohë me punët e bashkisë e t’u shërbejë njerëzve, me strukturat e partisë do të merret Ogerta. Të jenë dy shina mbi të cilat kalon lokomotiva jonë elektorale. Mos dëgjoni fjalët e dynjasë. Edhe pse e kritikoj Lalin, e dua më shumë se të gjithë ju. Aty në bashki ka ndodhur diçka e rëndë, por kujtoni si ishte korrupsioni në 2013 kur ne erdhëm në pushtet.
Veliaj: Tani avioni im do të punojë me dy motorë.
Rama: Lali ka qejf avionin, po më mirë të rrijë tek lokomotiva. Se kur fluturon shumë lart, nuk i dihet si është ulja në pistë.
Qartazi, kryeministri ka vijuar sërish lojën e tij me Erion Veliajn, duke i kujtuar se as zelli i tepruar dhe as mungesa e zellit nuk e ndihmojnë dot të kapërcejë greminën e marrëdhënies mes tyre. Me pak mundim, në memorien e gjithsecilit mund të vérviten lehtas të njëjtat batuta dhe “dashuri” që Rama ka shkëmbyer me Saimir Tahirin apo Arben Ahmetajn.
Vërtet Edi Ramës nuk i dalin llogaritë mirë nëse do ta flakë Erion Veliajn pak muaj para zgjedhjeve, por nëse ka vendosur ta mbajë ende diku në rreshtat e largëta të oborrit të tij, largësinë dhe rregullat do t’i vendosë ai dhe jo Veliaj. Ndryshe, sikurse dhe e ka paralajmëruar, “avionit” të Veliajt mund t’i mbarojë karburanti për të bërë ulje të detyruar... ndoshta dhe në SPAK apo gjykatë.
