Doreheqja e drejtorit të RTSH, Alfred Peza, dhe zhurma për arsyet e largimit të tij kanë ende shumë të panjohura për publikun. Edhe pse duket si një çështje me nota seksuale, VNA ka kërkuar të gjejë informacione më të sakta që hedhin dritë mbi atë çfarë ndodh realisht me transmetuesin shtetëror televiziv në Shqipëri.
Me emërimin e tij në krye të RTSH-së, Alfred Peza nisi një valë shkarkimesh të punonjësve dhe gazetarëve, lëvizje këto të denoncuara nga vetë stafi, opozita dhe shoqatat e gazetarëve. Por, duke qenë se TVSH-ja ka qenë dhe mbetet pronë ekskluzive e qeverive përkatëse, askush nuk bëri asgjë për të ndryshuar këtë realitet.
Me pak kujdes, vihet re se përveç shkarkimeve, Alfred Peza ka vendosur të shpërblejë besnikët e tij dhe të partisë që e ka emëruar me paga stratosferike. Shembulli më i qartë i kësaj është Blerta Tafani, gazetarja, mesazhet e së cilës u dorëzuan pranë bordit të TVSH-së si dokument për ngacmime të pretenduara seksuale nga drejtori.
Blerta Tafani është paguar saktësisht me 5 deri në 7 milionë lekë të vjetra në muaj si moderatore në një nga programet e TVSH-së. Së bashku me të, edhe Alban Dudushi është paguar me të njëjtat shifra çdo muaj. Vetëm pasi Bora Xhani drejtoreshë programacioni në TVSH, një tjetër e preferuar e drejtorit të përgjithshëm, nisi të ketë të njëjtat kërkesa për rrogë të lartë si Blerta Tafani, punët nuk nisën të shkojnë mirë dhe Alfred Peza u detyrua të largonte Blertën. Që nga ai moment, inatet mes “gazetareve” të superpaguara dhe dramat me drejtorin shkaktuan skandalin pas të cilit Peza dha dorëheqjen.
Qartazi, ngacmimet me mesazhe janë një akt i shëmtuar i një drejtuesi në çfarëdo institucioni. Dhe nëse faktohet se ngacmimet kanë qenë të vërteta, ai duhet të ndiqet penalisht për këtë akt. Por shkelja e ligjit dhe e moralit nis nga mënyra si është menaxhuar televizioni publik shqiptar, si është abuzuar me paratë e taksapaguesve, si janë superpaguar gazetarët dhe emisionet pa kurrfarë audience në kurriz të të larguarve nga puna dhe të atyre që punojnë prej dhjetëra vitesh aty dhe marrin paga si të administratës.
TVSH-ja është një gropë e madhe në buxhetin e Shqipërisë. Një ngrehinë e stërmadhe dhe aspak efikase, me aparatura të amortizuara dhe me programacion bolshevik, ku rezulton se marrin paga disa miliona dhe të preferuarit e drejtorit, dhe zarat e propagandës qeveritare. Ky institucion, i zhvlerësuar në tregun mediatik prej vitesh dhe totalisht jashtë risive të teknologjisë, ndoshta duhet të riformatohet për të qenë të paktën konkurrues në treg. Përndryshe, çdo kush i emëruar nga qeveria, nëse nuk do ta përdorë për qëllime meskine personale, do ta shndërrojë atë në vatër ku paguhen me rroga të larta patronazhistët e propagandës qeveritare.
