Analizat e mostrave të metaleve të sekuestruara pranë KURUM dhe “Sokolaj” shpk do të kryhen në laboratorin e Agjencisë Kombëtare të Burimeve Natyrore. Lajmi konfirmohet për VNA nga burime zyrtare të Prokurorisë së Durrësit, e cila prej disa ditësh po heton lidhur me eksportin e mbetjeve të dyshuara toksike nga Porti i Durrësit drejt Tajlandës, pa miratimin e shtetit pritës.
Mostrat u dorëzuan të premten që lamë pas nga agjentët e antikrimit dhe, sipas urdhrit të prokurorisë, ekspertët duhet të ruajnë kampione në rast se do të lindë nevoja për riekspertim gjatë hetimit.
Nga hetimet e deritanishme rezulton se kompania “Sokolaj” shpk, me administratore Gjovana Sokolaj, ka shoqëruar ngarkesën me një analizë të kryer në një laborator privat në Kroaci. Burime pranë prokurorisë thanë për VNA se drejt Kroacisë është nisur një letërporosi për të konfirmuar nëse këto analiza janë kryer apo mund të kemi të bëjmë me një rast falsifikimi.
2800 tonë mbetje të ngarkuara në 102 konteinerë janë në rrugën e kthimit për në Shqipëri, pasi Tajlanda refuzoi pranimin e kësaj ngarkese, duke mos dhënë miratimin e saj, dhe dyshohet se mbetjet janë toksike.
Prokuroria dje mori dëshminë e administratores likuidatore të kompanisë KURUM, ndërkohë që pritet të merret në pyetje edhe administratori i shoqërisë, një shtetas turk. Hetimet janë duke u zhvilluar për momentin për akuzat e shpërdorimit të detyrës dhe transportit të mbetjeve të rrezikshme.
