Prokuroria e Durrësit, e cila po heton skandalin e eksportit të 102 kontejnerëve me mbetje të dyshuara toksike nga Shqipëria drejt Tajlandës, ka hartuar një listë me personat që do të marrë në pyetje. "Jemi duke pyetur të gjithë zyrtarët apo personat e tjerë që janë marrë me procedurat në rastin konkret dhe do t'i ballafaqojmë me të dhënat e siguruara përmes sekuestrimit të dokumenteve," tha një burim i Prokurorisë për VNA.
Në mesin e personave që po pyeten janë përfaqësues të kompanisë Kurum, zyrtarë të doganave, si dhe punonjës të kompanisë Sokolaj shpk. Hetimet po kryhen për shpërdorim detyre dhe transport të mbetjeve toksike. Ngarkesa ndërkohë është rrugës së kthimit dhe parashikohet të mbërrijë në Portin e Durrësit në fund të muajit shtator. Kontejnerët do të sekuestrohen dhe prokuroria do të bëjë analizat për të konfirmuar se çfarë lënde është ngarkuar brenda tyre.
Nisja e sesionit të ri parlamentar, ndryshe nga sa pritej, nuk solli asnjë debat për këtë çështje. Një interpelancë e parashikuar me kryeministrin, e kërkuar nga kryetari i grupit parlamentar të PD-së, Gazment Bardhi, pritet të ndodhë më 12 shtator. Përveç Agron Dukës, asnjë politikan tjetër, qofshin të pozitës apo të opozitës, nuk e përmendi sot skandalin e transportit të mbetjeve toksike.
