Dy turistë të huaj kanë qenë dëshmitarë të ngjarjes ku humbi jetën biznesmeni Armandi Nelaj, teksa ishte nisur për të shpërthyer me minë të telekomanduar tragetin Finikas. Njëri prej tyre, shtetas anglez Nicholas M., ka rrëfyer për hetuesit rrethanat e ngjarjes tragjike.
“Rreth orës 13:00 erdha nga Ksamili, së bashku me shokun tij, Frederic R. Varkën e ankoruam tek zyra e emigracionit, tek Porti i Sarandës. Shkuam të bënim disa blerje në supermarket dhe u kthyem përsëri tek porti, aty ku kishim lënë varkën”, tregon Nicholas M. Ai shpjegon se në mbrëmje panë me dylbi, një person, i cili ishte duke veshur kostumin e zhytjes dhe u zhyt ne det. “Kishte edhe një maskë në fytyrë dhe vinte vërdallë varkës, tek pjesa e pasme, ku ndodhej motorri. U afruam dhe e pyetëm nëse kishte nevojë për ndihmë, pasi po tërhiqte dy çanta me ngjyrë të zezë. Ai u përgjigj se ishte në rregull dhe ne u larguam”, thotë turisti.
Ai kujton se sapo janë larguar disa metra, pas disa sekondash kanë dëgjuar një shpërthim shumë të fortë.
“U afruam për të parë se çfarë kishte ndodhur dhe pamë sende që po pluskonin mbi ujë. Personi ishte i plagosur rëndë. E tërhoqëm me varkë dhe e nxorëm në breg. Aty u afruan punonjësit e portit, për t'i na ndihmuar, për të nxjerrë trupin jashtë. Mbërriti ambulanca për ta marrë”, përfundon turisti.
I pyetur lidhur me shpërthimin nëse kanë parë tym apo flakë, thotë nuk mund të japë detaje sepse ka qenë me kurriz.
Ndërsa lidhur me momentin kur folën me personin para se të ndodhte shpërthimi ai thotë se: “nuk kishte shumë dëshirë që të fliste me ne, madje me maskë nëpër dhëmbë na foli”. Armandi Nelaj ndërroi jetë nga shpërthimi aksidental i minës së telekomanduar që kishte përgatitur sipas Prokurorisë bashkë me mikun e tij Eridion Muho për të shkatërruar anijen Finikas për shkaqe konkurrence.
