Nga e mërkura në mesditë, përballja e Sali Berishës me drejtësinë do të marrë një kthesë të rëndësishme, duke rënduar pozitën e tij ligjore. Ish-kryeministri, i cili ka qëndruar në arrest shtëpiak për rreth dhjetë muaj, deri tani ishte në statusin e personit nën hetim. Karta e tij më e fortë dhe argumenti kryesor i mbështetësve të tij ishte fakti se ai po mbahej në arrest pa një akuzë zyrtare dhe se burgosja e tij ishte politike. Megjithatë, sipas burimeve të besueshme pranë SPAK, nesër Berisha pritet të marrë statusin e të pandehurit për akuzën e korrupsionit pasiv, një zhvillim që është përfshirë në fletë-thirrjen e dërguar në adresën e tij.
Ende mbetet për t'u parë se cilat janë provat dhe gjetjet që rëndojnë ish-kryeministrin me përgjegjësi penale. Ajo që dihet deri tani është se nga nesër, Berisha do të jetë zyrtarisht i pandehur. Sipas prokurorisë, ai ka favorizuar dhëndrin e tij, Jamarbër Malltezi, në privatizimin e ish-klubit sportiv "Partizani".
Burime të sigurta kanë konfirmuar se Berisha pritet të lërë ambientet e banesës së tij në rrugën "Mustafa Matohiti" dhe të përballet për herë të dytë me prokurorët e Prokurorisë së Posaçme. Kjo do të ndodhë për dy arsye: së pari, për t'i informuar prokurorët se është i gatshëm të paraqitet sa herë që thirret dhe, së dyti, për t'u përgjigjur pyetjeve të medias, duke qenë se ka qenë në arrest shtëpiak për 10 muaj dhe ka komunikuar me mbështetësit vetëm përmes mesazheve nga banesa e tij në qendër të Tiranës.
Pas këtij zhvillimi procedurial, Berisha pritet të kërkojë heqjen e masës së sigurisë, duke argumentuar se nuk ekzistojnë më kushtet apo kriteret ligjore për ta mbajtur në arrest shtëpiak, pasi hetimi ka përfunduar dhe nuk ka rrezik për prishjen e provave. Gjithashtu, ai pritet të angazhohet në përgatitjet për zgjedhjet parlamentare të vitit 2025, pas vendimit të Gjykatës së Apelit që e njohu atë si kryetar të Partisë Demokratike.
