Tre varre që datojnë mijëra vjet më parë janë zbuluar në një kompleks të lashtë varresh në Egjiptin antik. Sipas Ministrisë së Turizmit dhe Antikiteteve të Egjiptit, varret i përkasin tre zyrtarëve të shquar nga epoka e Mbretërisë së Re (1539–1077 p.e.s.) dhe u zbuluan në Dra' Abu el-Naga, një nekropol i rëndësishëm jo-mbretëror në Luksor.
Sipas ministrit të turizmit dhe antikiteteve Sherif Fathy, gërmimi është realizuar plotësisht nga një ekip egjiptian dhe konsiderohet një zbulim i rëndësishëm për historinë arkeologjike të vendit. Ai e bëri këtë të ditur përmes një postimi në llogarinë zyrtare të ministrisë në Instagram.
Mohamed Ismail Khaled, sekretari i përgjithshëm i Këshillit Suprem të Antikiteteve të Egjiptit, tha se mbishkrimet brenda varreve ndihmuan ekipin të identifikojë emrat dhe titujt e pronarëve të tyre. Nevojitet punë shtesë për pastrimin dhe studimin e mbishkrimeve të mbetura.
Njëri nga varret i përket një personi të quajtur Amun-em-Ipet nga periudha Ramesside (dinastitë e 19-të dhe të 20-të), i cili ka punuar ose në tempullin ose në pronën e Amunit, perëndisë së nderuar si mbret i perëndive. Shumica e skenave në varrin e tij janë dëmtuar, përveç disa pamjeve që paraqesin bartës mobiljesh dhe një skenë banketi.
Një tjetër varr, që daton nga dinastia e 18-të, i përkiste një personi të quajtur Baki, i cili ka qenë mbikëqyrës i hambarëve.
Varrin e tretë, gjithashtu nga dinastia e 18-të, e zotëronte një person i quajtur Es, i cili mbante disa poste: mbikëqyrës në Tempullin e Amunit, kryetar i oazave veriore dhe shkrues.
Abdel Ghaffar Wagdy, drejtor i përgjithshëm i antikiteteve në Luksor dhe udhëheqës i misionit arkeologjik, përshkroi ndarjen e varreve. Sipas tij, varri i Amun-em-Ipet përfshin një oborr të vogël, një hyrje dhe një sallë katrore që përfundon me një absidë, me një mur perëndimor të dëmtuar.
Varrin e Baki e përbën një oborr i gjatë në formë korridori, që çon në një oborr tjetër dhe pastaj në hyrjen kryesore. Një sallë e zgjatur të çon në një tjetër sallë të gjatë, që përfundon me një dhomë të papërfunduar ku ndodhet puseta e varrimit.
Varrin e Es e karakterizon një oborr i vogël me pus, hyrja kryesore, dhe një sallë e gjerë që të çon në një sallë tjetër të gjatë – ende të papërfunduar.
Këto varre përfaqësojnë një tjetër zbulim të rëndësishëm në Luksor këtë vit. Në shkurt, një mision arkeologjik egjiptiano-britanik zbuloi varrin e mbretit Thutmose II, të cilin zyrtarët e quajtën atëherë një zbulim “të jashtëzakonshëm.”
