Presidenti francez Emmanuel Macron mohoi të hënën çdo “mosmarrëveshje familjare” me gruan e tij Brigitte, pasi një video e shpërndarë gjerësisht në rrjete sociale e shfaq atë duke ia shtyrë fytyrën bashkëshortes gjatë mbërritjes në Vietnam për një vizitë diplomatike.
Ata “po bënin shaka siç bëjmë shpesh”, u tha Macron gazetarëve në Hanoi.
“Një video mund të bëhet për të thënë shumë gjëra të pakuptimta. Thjesht bëja shaka me gruan time, siç bëjmë shpesh,” – u shpreh presidenti francez, duke tentuar të shuajë spekulimet që u përhapën pas pamjeve të regjistruara në aeroport.
Ai shtoi se edhe më herët është përballur me keqinterpretim të videove që qarkullojnë në internet, duke përmendur një rast kur u përfol se po ndante një qese kokaine dhe një tjetër ku u raportua se kishte një përballje me presidentin turk.
“Asnjë nga këto nuk është e vërtetë,” – tha Macron, duke nënvizuar se “të gjithë duhet të qetësohen dhe të përqendrohen te lajmet e vërteta.”
“Për mua, kanë kaluar tre javë. Nëse shikoni axhendën ndërkombëtare të presidentit francez, nga Kievi në Tiranë e deri në Hanoi, ka njerëz që kanë parë video dhe mendojnë se kam ndarë një qese kokaine, se kam pasur një takim kokë më kokë me një president turk dhe se tani po zihem me gruan time. Asnjë nga këto nuk është e vërtetë, megjithatë ato tre video janë të vërteta,” – theksoi ai.
Në pamjet që shkaktuan reagime në rrjet, Macron dhe bashkëshortja e tij Brigitte shihen duke zbritur nga avioni në Vietnam. Në një moment, ajo i shtyn fytyrën me dorë, ndërsa ai mbrohet lehtë dhe më pas përshëndet me dorë mikpritësit poshtë shkallëve të avionit. Videoja u komentua gjerësisht, por Macron sqaroi se bëhej fjalë vetëm për një batutë mes bashkëshortëve.
