Kryeministri izraelit, Benjamin Netanyahu, ka kritikuar ashpër Kryeministrin britanik Sir Keir Starmer dhe liderët e Francës dhe Kanadasë, duke thënë se ata “në thelb po mbështesin mbajtjen e Hamasit në pushtet”. Netanyahu i akuzoi ata se po mbajnë anën e “vrasësve masivë, përdhunuesve, vrasësve të foshnjave dhe rrëmbyesve”.
Kjo erdhi pas sulmit të së enjtes ndaj stafit të ambasadës izraelite në Washington, ku dy punonjës izraelitë u vranë. Sulmuesi, Elias Rodriguez, bërtiti “liri për Palestinën” gjatë arrestimit.
Mbretëria e Bashkuar, Franca dhe Kanadaja, ndërkohë që dënuan sulmin në Washington, kanë kritikuar gjithashtu ofensivën e zgjeruar të Izraelit në Gaza si “të tepruar”, duke e quajtur situatën humanitare “të papranueshme”.
Netanyahu tha se disa nga aleatët më të ngushtë të Izraelit po kërkojnë që Izraeli të pranojë mbijetesën e Hamasit dhe se kjo është një qëndrim i gabuar historikisht dhe humanisht. Ndërkohë, përfaqësues të qeverive britanike dhe franceze kërkuan hyrje masive dhe të lirë të ndihmave humanitare në Gaza, duke kritikuar kufizimet e Izraelit.
OKB-ja tha se niveli i ndihmave të lejuara deri më tani është larg nevojave të mëdha të popullsisë palestineze pas një bllokade 11-javore.
