Dy anëtarë të stafit të ambasadës izraelite në Shtetet e Bashkuara janë qëlluar për vdekje mbrëmjen e së mërkurës jashtë Muzeut Hebraik të Kryeqytetit në Uashington. Viktimat, një çift i ri, u qëlluan me armë zjarri teksa po dilnin nga një aktivitet që kishte në fokus ndihmën humanitare për banorët e Gazës.
Policia ka identifikuar dhe arrestuar autorin e dyshuar si Elias Rodriguez, 30 vjeç. Sipas autoriteteve, në momentin e arrestimit ai bërtiti “Palestina e lirë”, duke ngritur dyshime për një sulm të mundshëm të nxitur nga urrejtja. Policia ka nisur hetimet për të zbuluar nëse ngjarja ka lidhje me terrorizmin dhe ka kërkuar informacion shtesë mbi të kaluarën dhe motivet e të dyshuarit.
Ngjarja ka shkaktuar reagime të ashpra në të dy anët e Atlantikut. Presidenti amerikan Donald Trump e dënoi vrasjen përmes një deklarate të publikuar në rrjetin e tij “Truth Social”, ku e cilësoi aktin si një sulm të nxitur nga antisemitizmi.
“Këto vrasje të tmerrshme në Uashington, të bazuara padyshim në antisemitizëm, duhet të marrin fund, TANI! Urrejtja dhe radikalizmi nuk kanë vend në SHBA. Ngushëllime familjeve të viktimave. Sa e trishtueshme që gjëra të tilla mund të ndodhin! Zoti ju bekoftë të gjithëve”, shkroi ai.
Autoritetet lokale dhe federale kanë rritur masat e sigurisë në ambientet përreth dhe kanë nisur një hetim të thelluar në bashkëpunim me shërbimet e sigurisë kombëtare dhe partnerët ndërkombëtarë. Hetimet pritet të ndriçojnë më tej motivet e autorit dhe nëse ai ka vepruar i vetëm apo si pjesë e një rrjeti më të gjerë.
