Programi Botëror i Ushqimit (WFP) ka lëshuar një paralajmërim të fortë mbi krizën humanitare në Rripin e Gazës, duke theksuar se situata po përkeqësohet me shpejtësi dhe se më shumë se gjysmë milioni njerëz po përballen me uri ekstreme.
Në një postim zyrtar në rrjetin social X (ish-Twitter), WFP deklaroi:
“Jemi në një garë me kohën për të shmangur urinë. Nëse presim derisa të konfirmohet një zi buke, do të jetë tepër vonë për shumë njerëz.
Organizata u bëri thirrje bashkësisë ndërkombëtare të veprojë menjëherë, duke rikthyer ndihmën ushqimore për civilët në Gaza, përpara se situata të arrijë përmasa katastrofike.
Analiza më e fundit e sigurisë ushqimore në territor sugjeron se niveli i krizës ka kaluar pragjet kritike, dhe vonesat në ndihmën humanitare mund të kenë pasoja të pakthyeshme për mijëra fëmijë, gra dhe të moshuar.
Apeli i WFP vjen mes raportimeve për vështirësi të mëdha në shpërndarjen e ndihmave për shkak të bllokadave, mungesës së korridoreve të sigurta dhe situatës së rënduar të sigurisë në terren.
