Urdhri ekzekutiv i presidentit amerikan Donald Trump për të ndaluar të drejtën e shtetësisë amerikane me lindje nuk ka gjetur mbështetje në Gjykatën Supreme të Shteteve të Bashkuara. Gjatë një seance që zgjati më shumë se dy orë, asnjë nga gjyqtarët nuk foli në mbrojtje të ligjshmërisë së këtij urdhri, ndërsa disa prej tyre sugjeruan qartë se ai është “pothuajse me siguri jokushtetues”.
Tre gjyqtarë të gjykatave të distrikteve kishin përdorur më herët të ashtuquajturin “urdhër ndalimi kombëtar” për të bllokuar zbatimin e urdhrit të Trump, një instrument që është përdorur shpesh nga gjykatat për të ndaluar politikat federale që konsiderohen të padrejta ose të paligjshme. Këtu përfshihet kufizimi i imigracionit dhe shkurtimi i fondeve federale.
Gjatë seancës, gjyqtarët konservatorë të Gjykatës Supreme u shprehën të shqetësuar për përdorimin e këtij mjeti ligjor në nivel kombëtar. Sipas tyre, gjykatësit duhet të kufizohen në dhënien e vendimeve që prekin vetëm individët, grupet apo klasat e përcaktuara qartë që janë pjesë e padisë.
Ata sugjeruan se trajtimi i kësaj çështjeje si një padi kolektive do të ishte rruga më e drejtë, ndonëse ngritja e një padie të tillë përfshin procedura më të ndërlikuara dhe nuk siguron pezullim të menjëhershëm të një politike.
Nga ana tjetër, gjyqtarët liberalë ngritën shqetësime për pasojat praktike që do të kishte kufizimi i urdhrave gjyqësorë me shtrirje kombëtare. Sipas tyre, në mungesë të këtyre urdhrave, qeveria federale mund të vazhdojë të zbatojë politika që një gjykatë i ka shpallur të paligjshme, duke krijuar pabarazi në zbatimin e ligjit ndaj qytetarëve të ndryshëm.
Ky është një tjetër përplasje mes pushtetit ekzekutiv dhe sistemit gjyqësor lidhur me kufijtë e kompetencave presidenciale dhe mbrojtjen e të drejtave themelore në Shtetet e Bashkuara.
