Pas meshës së zgjedhjes në Kapelën Sistine, Papa Leoni XIV zhvilloi këtë të shtunë në mëngjes takimin e tij të parë me trupin e kardinalëve. Takimi, i mbajtur me dyer të mbyllura, shënon nisjen zyrtare të papatit të tij dhe u përqendrua në sfidat dhe drejtimet e reja për Kishën Katolike.
Kardinali nga Madagaskari, duke komentuar zhvillimet, tha se biseda me Papën e ri ishte frymëzuese dhe theksoi se kishin folur për domosdoshmërinë e një Kishe më kolegjiale dhe të përbashkët në vendimmarrje. “Ai është një Papë i shkëlqyer,” u shpreh ai për mediat.
Ndërkohë, në një letër reflektuese, Sekretari i Shtetit të Vatikanit, kardinali Pietro Parolin – i cili ishte ndër emrat më të përfolur për fronin papnor – vuri në dukje qetësinë e thellë në fytyrën e kardinalit Prevosti gjatë momenteve vendimtare të konklavit. “Emërimi u bë me shumë pak vota. Besoj se Papa Leoni XIV do të udhëhiqet nga hiret hyjnore, përvoja e tij si rregulltar dhe ndjekës i shenjtit Agustin, për të mirën e Kishës dhe të gjithë njerëzimit,” shkruan ai.
Axhenda e Papës Leoni XIV për ditët në vijim është tashmë e përcaktuar: të dielën, më 11 maj, ai do të mbajë lutjen e tij të parë Regina Coeli nga lozha qendrore e Shën Pjetrit. Të hënën, më 12 maj, ai do të përballet për herë të parë me shtypin botëror. Më 20 maj do të marrë zyrtarisht në dorëzim bazilikën papnore, ndërsa më 21 maj do të zhvillojë audiencën e parë të përgjithshme. Takimi me Kurinë Romake dhe punonjësit e Vatikanit është planifikuar për më 24 maj.
Papa Leoni XIV pritet të sjellë një frymë të re në drejtimin shpirtëror të Kishës Katolike, me fokus te dialogu, përulësia dhe forcimi i bashkëpunimit brenda komunitetit katolik në mbarë botën.
