Ndonjëherë, në kohë lufte, është zëri më i vogël ai që flet më fort.
Në spitalin Nasser në Gaza, një vajzë pesë muajshe përpiqet të qajë.
Siwar Ashour është e zbehur dhe mezi nxjerr zë. Ajo nuk ka energji të shprehë dhimbjen e saj. Nuk përthith dot qumësht të zakonshëm formulë dhe, sipas mjekëve, për shkak të bllokadës izraelite që po zgjat prej tre muajsh, furnizimet me ushqimin që ajo ka nevojë janë të rralla.
Siwari duket sikur ka peshën e luftës mbi mushkëritë e saj.
Nëna e saj, Najwa, 23 vjeçe, po i ndërron pelenën. Ajo peshon vetëm pak më shumë se 2 kg. Një vajzë 5 muajshe duhet të peshojë rreth ose mbi 6 kg.
“Nuk kishte fare ushqim kur e linda,” thotë Najwa.
“Nëse doja të haja që të kisha mundësi ta ushqeja me gji, nuk kisha asnjë lëndë ushqyese që të më përmirësonte shëndetin… Tani ajo pi vetëm formulë, dhe nuk e dimë si do ia sigurojmë.”
Izraeli ka ndaluar hyrjen e gazetarëve ndërkombëtarë në Gaza për të raportuar në mënyrë të pavarur.
Një koleg lokal i BBC ka filmuar shenjat e padiskutueshme të kequshqyerjes së rëndë në trupin e Siwarit: kokë më e madhe se trupi, krahë dhe këmbë si shkopinj, brinjët që i dalin jashtë lëkurës kur përpiqet të qajë, sy të mëdhenj kafe që ndjekin çdo lëvizje të nënës.
Najwa shqetësohet për atë që do ndodhë pasi të dalin nga spitali.
“Spitali me shumë vështirësi gjeti pak qumësht për të, kërkuan në të gjitha spitalet dhe e gjetën vetëm në një. Më thanë që kur të largohemi, do më japin një shishe, por ajo mjafton vetëm për katër ditë. Babai i saj është i verbër dhe nuk mund t’ia sigurojë. Edhe po ta gjenim, është shumë i shtrenjtë dhe ai nuk punon.”
Sipas mjekut të Siwarit, Ziad al-Majaida, ky është qëndrimi i saj i dytë në spital për mungesë të formulës.
“Asgjë nuk futet nga kufijtë, as ushqim, as qumësht, asgjë. Kjo po krijon probleme shumë të mëdha për fëmijët. Kjo foshnjë ka nevojë për një lloj të veçantë qumështi. Para bllokadës ishte i disponueshëm, por tani stoket kanë mbaruar.”
Spitali po përpiqet të gjejë furnizime të tjera, por Siwari është shumë e dobët dhe vuan nga diarre e vazhdueshme.
“Nëse vazhdon kështu, jeta e saj është në rrezik. Por nëse do i sigurohej qumështi dhe trajtimi i duhur, ajo do përmirësohej,” thotë mjeku.
Që nga fillimi i vitit, sipas OKB-së, janë identifikuar rreth 10,000 raste të kequshqyerjes akute tek fëmijët në Gaza.
Çmimet e ushqimeve janë rritur deri në 1,400%.
Kuzhinat bamirëse, që ndihmonin me ushqim qindra mijëra njerëz, po mbyllen për shkak të mungesës së furnizimeve.
25 furra buke që mbështeteshin nga Programi Botëror i Ushqimit janë mbyllur.
Në qytetin jugor Khan Younis, aty ku ndodhet spitali Nasser, gazetari i BBC vizitoi një kuzhinë të drejtuar nga “Shabab Gaza” (Rinia e Gazës), që shpërndan ushqim direkt tek familjet, një vakt në ditë për çdo familje.
Drejtuesi i organizatës, Mohammad Abu Rjileh, 29 vjeç, tha se 3 nga 4 kuzhinat e tyre janë mbyllur për shkak të mungesës së furnizimeve.
“Shumë nga organizatat që na ndihmonin janë plaçkitur. Në vend që të kishim mjaftueshëm për 10,000 vakte në ditë për një javë apo 10 ditë, tani kemi për vetëm një ose dy ditë. Nëse nuk hapen menjëherë kufijtë dhe nuk gjendet një zgjidhje, do detyrohemi të ndalojmë së gatuari.”
Izraeli ndërpreu çdo ndihmë humanitare dhe furnizime për Gazën më 2 mars dhe rifilloi ofensivën ushtarake dy javë më vonë, duke thënë se po bën presion mbi Hamasin për të liruar 59 pengjet që ende mban, prej të cilëve mendohet se rreth 24 janë gjallë.
Organizata e Kombeve të Bashkuara e ka cilësuar bllokadën izraelite si një “ndëshkim kolektiv mizor”ndaj civilëve.
Drejtori humanitar i OKB-së, diplomati britanik Tom Fletcher, tha se ligji ndërkombëtar është i qartë:
“Si fuqi pushtuese, Izraeli duhet të lejojë ndihmën humanitare të hyjë… Ndihma dhe jetët e civilëve nuk duhet të përdoren kurrë si mjet shantazhi.”
Gazetari i BBC e përballi me këtë deklaratë Boaz Bismuth, anëtar i lartë i partisë Likud të kryeministrit Netanyahu.
Ai mohoi ekzistencën e një krize ndihmash në Gaza:
“Ka ushqim në Gaza… Izraeli nuk do bënte kurrë një ndalim nëse popullata nuk do kishte ushqim. E njoh shumë mirë vendin tim,” tha ai.
Kur u ballafaqua me faktin se fëmijët po vdisnin urie, ai tha:
“Nuk ka fëmijë që po vdesin nga uria. Po e përsëris.”
Sipas tij, akuzat për uri, spastrim etnik dhe gjenocid janë “budallallëqe”.
“Asgjë nuk ka ndryshuar, sepse jemi Izrael, dhe i bindemi ligjit ndërkombëtar dhe atij humanitar.”
“Ne duam që pengjet të kthehen dhe Hamasi të largohet nga Gaza. Lufta mund të mbarojë për 30 sekonda.”
Izraeli ka akuzuar vazhdimisht Hamasin se uzurpon ndihmat, gjë që Hamasi e mohon.
Presidenti i Autoritetit Palestinez, Mahmoud Abbas, i vendosur në Bregun Perëndimor, ka akuzuar grupe të lidhura me Hamasin për grabitjen e ndihmave. Ai e quajti Hamasin “bij qenësh” dhe kërkoi lirimin e pengjeve izraelite.
Hamasi reagoi duke thënë se Abbas “përsërit në mënyrë të dyshimtë akuzat për krimet e pushtuesit [Izraelit] dhe agresionin e vazhdueshëm kundër popullit tonë”.
Pa mundësi për të hyrë në Gaza dhe raportuar në mënyrë të pavarur, është e vështirë të hetohen ngjarjet që po zhvillohen.
Bandat kriminale të dhunshme janë përfshirë rëndë në vjedhjen e ndihmave.
Hamasi ka kërcënuar me dhunë individët që akuzohen për vjedhje. Dy persona janë qëlluar për vdekje pranë një magazine të UNRWA-së, por nuk është e qartë se kush i vrau.
Një aktivist lokal i pranishëm, Moumen al-Natour, akuzoi Hamasin:
“Hamas po grumbullon ndihma, po i mohon popullit të uritur ushqimin dhe po e shet me çmime shumë të larta. Populli protestoi dhe kërkoi që ushqimi të shpërndahej, përndryshe do ta merrnin me forcë. Hamasi hapi zjarr ndaj të uriturve.”
E gjithë kjo ndodh në një klimë urie në rritje dhe kolapsi të rendit shoqëror për shkak të luftës dhe bllokadës.
Qeveria izraelite ka miratuar përshkallëzimin e ofensivës ushtarake në Gaza. Synimi mbetet shkatërrimi i Hamasit – një qëllim që mbetet i paarritur prej 19 muajsh luftë.
Raportohet se Izraeli planifikon të përdorë kompani private sigurie për shpërndarjen e ndihmave, megjithatë ende nuk ka një datë të caktuar.
OKB-ja dhe organizatat e mëdha humanitare e kanë cilësuar këtë si politizim të ndihmës dhe kanë deklaruar se nuk do të bashkëpunojnë me një sistem të tillë. /BBC
