Friedrich Merz është zgjedhur kancelar i Gjermanisë në raundin e dytë të votimit në Bundestag, duke fituar besimin e 325 deputetëve – në tejkalim të pragut minimal prej 316 votash të nevojshme. Zgjedhja e tij erdhi pas një raundi të parë të dështuar më herët gjatë ditës, që u cilësua si një humbje e paprecedentë dhe sinjal i qartë i pakënaqësive të brendshme në koalicionin qeverisës.
Seanca e pasdites të së martës u organizua me urgjencë, pasi rezultati i parë shkaktoi paqartësi mbi të ardhmen politike të Gjermanisë dhe stabilitetin e qeverisë së re. Merz, lider i CDU-së, do të pasojë Olaf Scholz në drejtimin e qeverisë federale, në një moment të ndjeshëm për politikën e brendshme dhe ndërkombëtare të vendit.
Zgjedhja e Merz shihet si një kthesë në qeverisjen gjermane, duke shënuar rikthimin e konservatorëve në pushtet pas katër vitesh opozitë.
