Presidenti Donald Trump ka shkarkuar këshilltarin për sigurinë kombëtare, Michael Waltz, dhe në vend të tij ka emëruar përkohësisht senatorin republikan Marco Rubio. Lëvizja vjen mes një vale tensioni dhe paqartësish në administratën amerikane, ku figura të rëndësishme të sigurisë kombëtare, përfshirë Sekretarin e Mbrojtjes Pete Hegseth, ndodhen nën presion dhe hetim.
Sipas Wall Street Journal, Zyra e Inspektorit të Përgjithshëm të Mbrojtjes ka zgjeruar hetimin për rrjedhje të informacionit të klasifikuar, duke përfshirë në dosje edhe një bisedë të krijuar nga Hegseth ku morën pjesë bashkëshortja e tij Jennifer Rauchet, vëllai Phil Hegseth dhe avokati Tim Parlatore. Në këtë komunikim përmes aplikacionit Signal, Hegseth ka ndarë të dhëna sensitive mbi një plan ushtarak për të goditur Huthitët në Jemen. Hetimi synon të përcaktojë nëse janë ndjekur protokollet zyrtare për përdorimin e aplikacioneve komerciale në komunikimet qeveritare. Ende nuk dihet kur do të përfundojnë hetimet, por çështja po ngre shqetësime serioze për sigurinë e informacionit brenda kabinetit të presidentit.
Ndërkohë, shkarkimi i Michael Waltz-it erdhi pas një sërë incidentesh që vunë në dyshim besueshmërinë e tij në një rol kyç. Skandali më i fundit lidhej me përfshirjen aksidentale të redaktorit të revistës The Atlantic në një grup të brendshëm qeveritar në Signal, si dhe me përdorimin e llogarisë personale të Gmail-it për të shpërndarë informacione të klasifikuara. Këto veprime provokuan kritika të forta nga demokratët dhe heshtje të thellë nga republikanët, ndërsa vetë Trump, fillimisht hezitues për ta shkarkuar, u bind nga këshilltarët dhe grupi MAGA se Waltz nuk ishte më i përshtatshëm për pozicionin.
Largimi i Waltz mund të jetë pjesë e një spastrim të gjerë që presidenti duket se po ndërmerr në kabinetin e tij, i ngjashëm me stilin që përdori gjatë mandatit të parë, kur brenda muajve të parë largoi figura të njohura si Steve Bannon, Reince Priebus dhe Michael Flynn – ky i fundit gjithashtu këshilltar për sigurinë kombëtare që dha dorëheqjen pas vetëm tre javësh në detyrë.
Në qendër të kritikave është edhe Pete Hegseth, kreu aktual i Pentagonit, i cili përveç përfshirjes në rrjedhje informacioni, raportohet se ka krijuar grupe komunikimi ku shpërndante të dhëna sekrete me persona jashtë strukturave të sigurisë, përfshirë familjarë dhe avokatin e tij personal. Në një takim të fundit të kabinetit, Trump e prezantoi me ironi si “personin më pak të diskutueshëm në qeveri”, duke shkaktuar të qeshura në sallë, por komentet e tij nuk e kanë qetësuar situatën e tensionuar që po përshkon nivelet më të larta të administratës.
Në sfond, figura influente si Laura Loomer, aktivistja ultra-konservatore e njohur për ndikimin e saj në rrethin e Trump, ka ushtruar presion publik për largimin e disa emrave kyç, përfshirë Waltz dhe zëvendësin e tij Alex Wong, ndërsa ka kritikuar hapur edhe Hegseth. Me emërimin e Marco Rubios, Trump synon të japë një sinjal force dhe riorganizimi, por lëvizja shihet edhe si fillimi i një ristrukturimi më të thellë në prag të sfidave të reja të sigurisë kombëtare dhe fushatës presidenciale në horizont.
