Stambolli u kthye më 1 maj në një arenë përplasjesh mes policisë dhe protestuesve, teksa Dita Ndërkombëtare e Punës u shndërrua në një valë zemërimi qytetar kundër qeverisë turke. Me rrugë të bllokuara, transport të kufizuar dhe praninë masive të policisë, qyteti u paralizua pjesërisht në përpjekje për të frenuar tubimet masive që u organizuan nga opozita dhe sindikatat.
Bilanci i protestave deri në mesditë është i rëndë: mbi 200 persona janë ndaluar, përfshirë avokatëdhe aktivistë të cilët po përpiqeshin të ndjekin rastet e ndalimeve. Sipas një shoqate ligjore, shumë prej tyre u arrestuan në zonën përreth sheshit Taksim, pika simbolike e protestave në Turqi, pavarësisht ndalimeve të vendosura prej vitesh për grumbullime në këtë hapësirë.
Policia e trazirave ndërhyri me forcë në disa raste, ku më të ashpra ishin përplasjet me Partinë e Lirisë së Popullit, anëtarë të së cilës u përpoqën të thyenin barrierat policore. Rreth 30 aktivistë nga kjo parti u arrestuan menjëherë.
Përveç kërkesave klasike për të drejta pune, rroga më të larta dhe kushte më të mira jetese, protestuesit këtë vit kishin një motiv shtesë: arrestimin e kryebashkiakut të Stambollit, Ekrem Imamoglu, në muajin mars. Ky veprim ka ndezur valën më të madhe të protestave në Turqi që prej vitit 2013, kur sheshi Taksim u kthye në epiqendrën e sfidës ndaj qeverisë së atëhershme të Rexhep Tajip Erdogan.
Tubimet zyrtare ishin planifikuar në anën aziatike të qytetit, por tensionet më të mëdha u regjistruan në bregun evropian, ku autoritetet përqendruan forcat e sigurisë për të ndalur grumbullimet spontane dhe marshimet drejt Taksimit.
