Partia Likud e kryeministrit izraelit, Benjamin Netanyahu, ka njoftuar se do të kërkojë përjashtimin nga zgjedhjet parlamentare të 27 tetorit të dy forcave politike me shumicë arabe në Izrael.
Likud deklaroi se do të paraqesë kërkesa për skualifikimin e Listës së Përbashkët dhe Listës së Bashkuar Arabe (Ra’am), duke i akuzuar ato për mbështetje të “terrorizmit”. Sipas partisë së Netanyahut, të dyja forcat politike kanë denigruar ushtarët izraelitë dhe kanë refuzuar ta cilësojnë Hamasin dhe Hezbollahun si organizata terroriste. Likud nuk paraqiti prova për të mbështetur këto akuza.
Nisma vjen në një moment kur Likud ka intensifikuar sulmet politike ndaj ish-shefit të Shtabit të Ushtrisë izraelite, Gadi Eisenkot, partia e të cilit, Yashar, është shfaqur si një nga rivalët kryesorë të Netanyahut në garën elektorale.
Likud i ka cilësuar dy partitë arabe si “partnerë natyralë” të Eisenkotit dhe ka pretenduar se ai mund të mbështetet tek ato, si edhe tek liderët e opozitës Yair Golan dhe Avigdor Lieberman, për të formuar një qeveri pas zgjedhjeve.
Lista e Përbashkët përfaqëson një aleancë të partive politike arabe në Izrael, ndërsa Ra’am, e drejtuar nga Mansour Abbas, garon veçmas pasi u shkëput nga kjo aleancë. Në vitin 2021, Ra’am u bë partia e parë arabe që iu bashkua një koalicioni qeverisës në Izrael.
Sondazhet e fundit kanë nxjerrë partinë Yashar të Eisenkotit përpara Likud, ndërsa as blloku i Netanyahut dhe as opozita nuk duket se kanë siguruar aktualisht një shumicë të qartë prej 61 mandatesh, e nevojshme për formimin e qeverisë.
Në këtë situatë, partitë arabe mund të luajnë një rol vendimtar në përcaktimin e ekuilibrave politikë dhe në negociatat për formimin e koalicionit të ardhshëm pas zgjedhjeve.
