Gjatë vizitës së tij të fundit në Mbretërinë e Bashkuar, Princi Harry është bërë pjesë e një situate jo të zakontë, që ka ngjallur kuriozitet dhe komentime në lagjen ku ndodhej. Duka i Sussex ka trokitur në derën e gabuar – jo një herë, por plot tre herë – teksa përpiqej të gjente shtëpinë e një miku në Londër.
Sipas gazetës britanike The Sun, një kamerë sigurie e ka filmuar princin duke qëndruar para hyrjes së një shtëpie të gabuar, ndërsa fliste në telefon. Derën e hapi një pastruese, e cila nuk e njohu menjëherë. “U habitëm kur pamë se ishte ai në kamera. E kuptuam vetëm kur fqinjët nisën të flisnin për të,” tha ajo.
Banorë të zonës e kanë përshkruar incidentin si “të çuditshëm”, ndërsa disa prej tyre ngritën pikëpyetje mbi sjelljen e princit. “Nuk mendoj se shumë njerëz do të ecnin nëpër rrugë duke trokitur në dyer të rastësishme – veçanërisht nëse pretendon se nuk ndihesh i sigurt,” komentoi një prej fqinjëve.
Vizita e Harry-t në Londër lidhej me një çështje ligjore të rëndësishme: apelimin e vendimit të qeverisë britanike për t’i hequr atij të drejtën për mbrojtje të financuar publikisht, pas largimit nga detyrat mbretërore dhe zhvendosjes në SHBA. Në argumentimin e tij, Duka tha se rreziku për jetën e tij dhe të familjes së tij nuk është zhdukur, dhe se vendimi i komitetit të sigurisë RAVEC është i padrejtë.
Pas incidentit me adresën, u konfirmua se Harry kishte qëndruar në shtëpinë e një miku gjatë pjesës tjetër të vizitës në Britani.
