Pavarësisht se gjykata mori vendim për pezullimin e përkohshëm të ekstradimit të shtetasit Rus Igor Kokunov, ky vendim nuk është respektuar nga Ministri i Drejtësisë Ulsi Manja. Ai ka firmosur dokumentin për ekstradimin e Kokunov dhe shtetasi rus është nisur drejt Rusisë transit nga Turqia.
Avokatët e tij e konsiderojnë këtë si skandal dhe kanë informuar të gjithë organizmat kombëtare dhe ndërkombëtare. Ata shpresojnë se të pengohet ekstradimi edhe pse në këto momente avioni i Kokunov po mbërrin në Turqi.
Sipas avokatëve, rasti tashmë është në dorë të Interpolitit Stambolli, të cilët mund të pengojnë procedurën e ekstradimit. Por nuk dihet se sa e mundur mund të jetë një veprim i tillë që në zonën transit zyra e interpolit të veprojë.
Vlen të theksohet se ky është një rast tjetër se si institucionet e shtetit shpërfillin vendimet e Gjykatës Kushtetuese.
Kujtojmë se 60-vjeçari i arrestuar në Shqipëri, e ka refuzuar ekstradimin drejt Rusisë. I njohur me nofkën “Vasia Bandit”, prokuroria ruse ka theksuar se nga viti 1993 deri në 2019, ai ka mbajtur pozita të larta në hierarkinë kriminale.
Gjatë seancave gjyqësore Igor Kokunov ka pranuar se ka probleme me drejtësinë në Moskë, por proceset penale janë stimuluar për shkak të marrëdhënies jo të mirë që ka ai me regjimin diktatorial të Presidentit, Vladimir Putin.
