Një qetësi e brishtë duket se është vendosur pas tensioneve të fundit në Lindjen e Mesme, ndërsa SHBA dhe Irani vijojnë sinjalet e kundërta mbi të ardhmen e negociatave dhe mundësisë së përshkallëzimit ushtarak.
Presidenti amerikan Donald Trump deklaroi se e sheh situatën si “50-50” mes arritjes së një marrëveshjeje dhe një përshkallëzimi të mundshëm drejt konfliktit, duke lënë të hapur edhe skenarin e sulmeve të reja nëse nuk arrihet dakordësia.
Sipas tij, negociatat me Iran janë intensive dhe ai pritet të marrë një vendim në ditët në vijim, ndërsa theksoi se çdo marrëveshje duhet të garantojë që Teherani të mos pajiset me armë bërthamore.
Në anën tjetër, autoritetet iraniane këmbëngulin për vijimin e bisedimeve, por njëkohësisht paralajmërojnë se vendi mbetet i vendosur nëse situata kalon në përballje ushtarake. Ministria e Jashtme iraniane ka theksuar se ekzistojnë “dallime të thella dhe thelbësore”, megjithëse flitet edhe për një afrim të mundshëm mes palëve.
Raportime ndërkombëtare sugjerojnë se po shqyrtohet një zgjatje e armëpushimit me 60 ditë, që mund të përfshijë lehtësime ekonomike dhe diskutime mbi programin bërthamor iranian, përfshirë çështjen e uraniumit të pasuruar.
Ndërkohë, ndërmjetësime rajonale dhe takime diplomatike vijojnë, teksa të dyja palët mbeten në gatishmëri për çdo zhvillim të papritur, duke e mbajtur situatën ende të pasigurt.
