Zyrtarët e shtetit të Floridës kanë rënë dakord t’i paguajnë 485 mijë dollarë biologes Brittney Brown, e cila u pushua nga puna pasi kritikoi aktivistin konservator Charlie Kirk në rrjetet sociale pas vrasjes së tij në vitin 2025.
Brown punonte prej rreth shtatë vitesh për Komisionin e Floridës për Ruajtjen e Jetës së Egër (FWC). Ajo u shkarkua në shtator të vitit të kaluar pasi ripostoi në llogarinë e saj personale në Instagram një meme satirike që pretendonte se Kirk nuk do të shqetësohej për fëmijët e vrarë në shkolla.
Postimi u shpërnda më pas nga llogari konservatore në rrjetet sociale, përfshirë “Libs of TikTok”, të cilat publikuan identitetin dhe vendin e saj të punës, ndërsa Brown u pushua nga puna një ditë më vonë.
Biologia ngriti padi federale, duke argumentuar se ishin shkelur të drejtat e saj kushtetuese për lirinë e shprehjes dhe se kishte vështirësi të gjente një punë tjetër, pasi agjencia shtetërore kontrollon fushën ku ajo ishte specializuar në kërkimin shkencor.
Sipas marrëveshjes së arritur këtë javë, Brown do të marrë kompensim për pagat e humbura, dëmet dhe tarifat ligjore. Në këmbim, ajo ka pranuar të mos rikthehet më në punë pranë agjencisë.
Gjatë procesit gjyqësor doli gjithashtu se drejtues të agjencisë kishin ekzagjeruar numrin e ankesave publike kundër saj. Një gjykatës federal vendosi sanksione ndaj një zyrtareje të FWC pasi pretendoi gabimisht se postimi kishte shkaktuar “qindra ankesa”, ndërkohë që realisht ishin rreth 50.
Rasti i Brown është një nga disa çështje ligjore të hapura në SHBA lidhur me pushimet nga puna pas komenteve në rrjetet sociale për vrasjen e Charlie Kirk.
