Një Tesla Cybertruck përfundoi i zhytur në një liqen në Teksas pasi shoferi vendosi të testonte funksionin “Wade Mode”, që lejon automjetin të kalojë në ujëra të cekëta.
Sipas policisë së Grapevine, drejtuesi i mjetit e futi qëllimisht makinën në liqen pranë Katie’s Woods Park Boat Ramp për të provuar funksionin e reklamuar nga Tesla.
Por eksperimenti përfundoi keq. Automjeti u bllokua dhe nisi të mbushej me ujë, duke detyruar shoferin dhe pasagjerët të dilnin me shpejtësi nga makina dhe të kërkonin ndihmë.
Fotot e publikuara nga policia tregojnë Cybertruck-un gjysmë të fundosur pranë bregut të liqenit.
Shoferi u arrestua më pas për hyrje me automjet në një zonë të ndaluar të parkut dhe për shkelje të rregullave të sigurisë ujore.
Në reagimin e saj, policia kujtoi se fakti që një automjet mund të hyjë fizikisht në ujë nuk do të thotë se kjo është e ligjshme apo e sigurt.
Sipas manualit të Tesla Cybertruck, funksioni “Wade Mode” lejon kalimin në lumenj apo përrenj të cekët me thellësi deri në rreth 81 centimetra, por paralajmëron se drejtuesi i mjetit duhet të vlerësojë vetë thellësinë dhe kushtet e terrenit, pasi automjeti mund të fundoset në sipërfaqe të buta ose me baltë.
