Shtetet e Bashkuara kanë ngritur akuza ndaj ish-udhëheqësit kubanez Raúl Castro për komplot në vrasjen e shtetasve amerikanë dhe rrëzimin e dy avionëve civilë në vitin 1996 mbi ngushticën mes Kubës dhe Floridës. Në incident humbën jetën katër persona, mes tyre tre amerikanë, pjesëtarë të grupit kubano-amerikan “Brothers to the Rescue”.
Akuza u shpall në Miami nga zëvendësprokurori i përgjithshëm amerikan Todd Blanche, i cili deklaroi se SHBA “nuk i harron qytetarët e saj”. Përveç vrasjes, Castro akuzohet edhe për shkatërrim avioni dhe ndaj tij është lëshuar urdhër arresti.
Qeveria kubaneze e quajti vendimin “manovër politike pa bazë ligjore”. Presidenti kubanez Miguel Díaz-Canel tha se Kuba veproi në “vetëmbrojtje legjitime” dhe akuzoi SHBA-në se po përdor çështjen për të shtuar presionin ndaj regjimit komunist.
Rasti vjen në një moment tensionesh të forta mes Uashingtonit dhe Havanës. Administrata e Donald Trump ka shtuar sanksionet ndaj Kubës, ndërsa sekretari amerikan i shtetit Marco Rubio akuzoi ushtrinë kubaneze për krizën ekonomike, mungesat e ushqimit dhe ndërprerjet e energjisë në vend.
Në Miami, komuniteti kubano-amerikan e përshëndeti vendimin si “drejtësi të vonuar”, ndërsa analistët paralajmërojnë se Kuba nuk ka gjasa të dorëzojë Raúl Castron pa rezistencë dhe se tensionet mes dy vendeve mund të përshkallëzohen më tej.
