Olga Tokarczuk ka pranuar publikisht se përdor inteligjencën artificiale gjatë procesit të saj krijues, duke ndezur një debat të ri mbi rolin e AI në letërsi.
Në një intervistë të fundit në polonisht, fituesja e Çmimit Nobel tregoi se gjatë shkrimit të romanit të saj më të fundit pyeti një model të avancuar AI se çfarë këngësh mund të dëgjonin personazhet e saj në një vallëzim disa dekada më parë.
“AI më dha disa tituj”, tha Tokarczuk.
Shkrimtarja shtoi se shpesh i drejtohet inteligjencës artificiale me tone pothuajse intime:
“Shpesh i them makinës: ‘Zemër, si mund ta zhvillojmë bukur këtë?’”
Edhe pse pranoi se AI mund të prodhojë “halucinacione” dhe gabime faktike, sidomos në ekonomi apo të dhëna teknike, Tokarczuk tha se në letërsinë artistike kjo teknologji përbën “një avantazh me përmasa të pabesueshme”.
Sipas saj, shkrimtarët mund të jenë ndër profesionet që do të përshtaten më shpejt me inteligjencën artificiale, sepse mendja letrare funksionon ndryshe nga ajo akademike.
“Kokat dhe mendjet tona letrare funksionojnë përmes lidhjeve shumë të gjera asociative të fakteve”, u shpreh ajo.
Tokarczuk zbuloi gjithashtu se ka blerë versionin më të avancuar të një modeli gjuhësor dhe se është “thellësisht e tronditur” nga mënyra se si AI zgjeron horizontin dhe mendimin e saj krijues.
Në intervistë, autorja la të kuptohet se projekti aktual mund të jetë libri i saj i fundit, pasi beson se lexuesit modernë nuk janë më të interesuar për letërsi komplekse.
Ajo tha se ndjen nostalgji për mënyrat e vjetra të krijimit, por duket se e ka pranuar se ato mund të jenë zhdukur përgjithmonë.
