Një sulm i rëndë me armë zjarri ka tronditur qytetin e San Diego, ku dy adoleshentë qëlluan për vdekje tre burra pranë një xhamie, përpara se t’i jepnin fund jetës së tyre. Autoritetet amerikane dyshojnë se krimi mund të ketë qenë i motivuar nga urrejtja.
Sipas policisë, ngjarja ndodhi të hënën në mëngjes në Islamic Center of San Diego, ndërsa oficerët po hetonin fillimisht një telefonatë për një adoleshent që dyshohej se kishte tentuar vetëvrasjen dhe ishte larguar nga shtëpia.
Pak më vonë, policia mori njoftim për të shtëna me armë në qendrën islamike. Në vendngjarje u gjetën tre viktima me plagë fatale nga armët e zjarrit jashtë hyrjes së ndërtesës.
Ndërkohë, autoritetet morën edhe një telefonatë tjetër për të shtëna nga një automjet ndaj një projektuesi peizazhesh në zonë. Gjatë kërkimeve, oficerët zbuluan dy të dyshuarit, 17 dhe 18 vjeç, të vdekur brenda një automjeti disa blloqe larg xhamisë. Sipas hetimeve paraprake, ata kishin vrarë veten.
Mes viktimave ishte edhe një roje sigurie e qendrës islamike, për të cilin zyrtarët thanë se “luajti një rol kyç” në përpjekjen për të ndalur sulmin dhe për të mbrojtur njerëzit që ndodheshin aty.
Autoritetet federale dhe policia lokale po hetojnë motivet e sulmit, ndërsa pista kryesore mbetet ajo e një krimi të nxitur nga urrejtja.
