Një juri federale në Oakland të Kalifornisë vendosi të hënën kundër Elon Musk në padinë e tij ndaj OpenAI, duke arritur në përfundimin se kompania e inteligjencës artificiale nuk mban përgjegjësi për pretendimet se kishte devijuar nga misioni i saj fillestar për t’i shërbyer njerëzimit.
Vendimi unanim i jurisë theksoi se Musk e kishte ngritur çështjen shumë vonë. Procesi gjyqësor nisi më 28 prill dhe u konsiderua gjerësisht si një moment kyç për të ardhmen e OpenAI dhe të inteligjencës artificiale në përgjithësi, përfshirë mënyrën se si duhet të përdoret dhe kush duhet të përfitojë financiarisht prej saj.
Gjatë 11 ditëve të procesit, avokatët e Musk dhe të OpenAI sulmuan vazhdimisht besueshmërinë e njëri-tjetrit. Të dy palët akuzuan kundërshtarin se ishte më i interesuar për para sesa për interesin publik.
Në argumentin përfundimtar, avokati i Musk, Steven Molo, u tha juristëve se disa dëshmitarë kishin vënë në dyshim sinqeritetin e Sam Altman, duke e quajtur madje gënjeshtar. Ai kujtoi gjithashtu se vetë Musk nuk kishte dhënë një “po” të prerë kur ishte pyetur nëse ishte plotësisht i besueshëm.
“Besueshmëria e Sam Altman është drejtpërdrejt në qendër të çështjes. Nëse nuk e besoni atë, ata nuk mund të fitojnë”, deklaroi Molo.
Musk akuzonte OpenAI se po përpiqej të pasuronte investitorët dhe njerëzit e brendshëm në kurriz të misionit jofitimprurës të organizatës, duke mos i dhënë përparësi sigurisë së inteligjencës artificiale. Ai pretendonte gjithashtu se Microsoft e kishte ditur prej kohësh se OpenAI ishte më shumë i fokusuar te fitimi sesa te altruizmi.
Nga ana tjetër, OpenAI argumentoi se ishte vetë Musk ai që kishte parë mundësi fitimi dhe se kishte pritur shumë gjatë për të pretenduar se kompania kishte shkelur marrëveshjen themeluese për zhvillimin e inteligjencës artificiale të sigurt në dobi të njerëzimit.
“Zoti Musk mund ta ketë prekjen e Midasit në disa fusha, por jo në inteligjencën artificiale”, tha në mbyllje avokati i OpenAI, William Savitt.
OpenAI konkurron me kompani të tjera të inteligjencës artificiale si Anthropic dhe xAI, ndërsa po përgatitet për një dalje të mundshme në bursë që mund ta vlerësojë kompaninë deri në 1 trilion dollarë.
Një drejtues i Microsoft dëshmoi gjatë gjyqit se kompania ka investuar mbi 100 miliardë dollarë në partneritetin me OpenAI.
Ndërkohë, kompania xAI e Elon Musk tashmë është pjesë e grupit SpaceX dhe po përgatitet gjithashtu për një dalje në bursë, që sipas raportimeve mund të rivalizojë ose edhe të tejkalojë vlerën e OpenAI.
