Presidenti amerikan Donald Trump ka lënë të hapur mundësinë e rikthimit të operacioneve ushtarake në shkallë të gjerë kundër Iranit, duke deklaruar se së shpejti do të duhet të marrë një “vendim të madh” për vijimin e konfliktit.
Në një intervistë për Axios, Trump tha se po shqyrton nëse Shtetet e Bashkuara duhet të ndërmarrin një ofensivë të re kundër regjimit iranian.
“Kam një vendim të madh përpara meje. A dua të hyj dhe ta shkatërroj regjimin iranian apo jo? Është një vendim i madh. Çdo gjë mund të më ndodhë”, deklaroi presidenti amerikan.
Deklaratat vijnë përpara takimit të Trump me udhëheqësit e gjashtë vendeve të Gjirit, në kuadër të punimeve të Asamblesë së Përgjithshme të OKB-së në Nju Jork.
Në takim pritet të marrin pjesë drejtuesit e Arabisë Saudite, Emirateve të Bashkuara Arabe, Katarit, Bahreinit, Kuvajtit dhe Omanit. Trump bëri të ditur se dëshiron të dëgjojë qëndrimet e aleatëve të SHBA-së në rajon përpara se të përcaktojë hapat e ardhshëm.
“Dua të di se ku janë dhe si po shkojnë. Ne kemi qenë shumë mbrojtës ndaj tyre”, u shpreh ai.
Një nga çështjet kryesore është nëse Uashingtoni do të tentojë një tjetër rrugë diplomatike me Teheranin apo do të rikthehet në operacione të gjera ushtarake.
Trump pretendoi gjithashtu se Irani është në komunikim të drejtpërdrejtë me Shtetet e Bashkuara dhe se Teherani kërkon arritjen e një marrëveshjeje.
Presidenti amerikan nuk përcaktoi një afat konkret se kur do të marrë vendimin përfundimtar për mënyrën se si SHBA do të veprojë ndaj Iranit.
