Fondacioni Hind Rajab ka paraqitur në Itali një kallëzim ndaj një ushtari të Forcave të Mbrojtjes së Izraelit, i cili ndodhet me pushime në Toskanë, duke e akuzuar për përfshirje në krime lufte, krime kundër njerëzimit dhe akte gjenocidi gjatë luftës në Gaza.
Sipas fondacionit, ushtari Yonatan Chalich do të ishte përfshirë në tre episode gjatë shërbimit të tij në Gaza, nga tetori 2023 deri në gusht 2024: rrethimi dhe shkatërrimi i spitalit Al-Shifa, djegia e xhamisë Haj Hamdi Harzallah në lagjen Nasser dhe shkatërrimi i Sheshit Palestina në Gaza City.
Organizata u ka kërkuar autoriteteve italiane të hapin hetim, duke pretenduar se Chalich ka dokumentuar vetë praninë e tij në kompleksin e spitalit Al-Shifa gjatë operacionit të mars-prillit 2024. Sipas vlerësimeve të Organizatës Botërore të Shëndetësisë, të cituara nga fondacioni, struktura pësoi dëme të rënda dhe doli jashtë funksionit.
Fondacioni Hind Rajab, me seli në Belgjikë, u krijua tetë muaj pas vdekjes së Hind Rajab, vajzës 6-vjeçare palestineze të vrarë në Gaza në janar 2024. Organizata mbledh prova, video, fotografi, postime në rrjete sociale, dëshmi dhe pamje satelitore për të ngritur kallëzime ndaj ushtarëve izraelitë në vende që kanë nënshkruar Statutin e Romës.
Sipas mediave italiane, gjatë vitit 2026 fondacioni ka paraqitur edhe dy kallëzime të tjera në Itali ndaj ushtarëve izraelitë që ndodheshin me pushime, por pa pasoja konkrete deri tani. Një rast i ngjashëm në Brazil solli reagim më të fortë, pasi autoritetet urdhëruan policinë të hetonte dhe të vepronte ndaj të dyshuarit.
