Kryeministri izraelit Benjamin Netanyahu ka ashpërsuar tonet ndaj kryebashkiakut të Nju Jorkut, Zohran Mamdani, vetëm pak para udhëtimit të tij drejt qytetit, ku pritet të marrë pjesë në punimet e Asamblesë së Përgjithshme të Kombeve të Bashkuara.
Në një video të publikuar në platformën X, Netanyahu e akuzoi Mamdanin se mbështet Hamasin dhe se, me qëndrimet e tij publike kundër qeverisë izraelite, ka nxitur tensione ndaj komunitetit hebre në Nju Jork.
“Turp për ty, zoti Mamdani”, tha Netanyahu në mesazhin e tij, duke shtuar: “Turp për ty që mbështet përbindëshat terroristë të Hamasit që masakruan popullin tonë. Turp për ty që nxit trazira kundër hebrenjve të Nju Jorkut”.
Sipas Reuters dhe AP, përplasja vjen në një moment kur Mamdani ka përsëritur qëndrimin se Netanyahu duhet të arrestohet gjatë vizitës së tij në Nju Jork, duke iu referuar urdhërarrestit të Gjykatës Penale Ndërkombëtare ndaj kryeministrit izraelit për akuzat lidhur me luftën në Gaza. Megjithatë, Mamdani ka pranuar më herët se autoritetet e qytetit nuk kanë kompetencë ligjore për ta kryer një arrestim të tillë.
Netanyahu tha se në OKB do të mbrojë veprimet ushtarake të Izraelit dhe do t’u përgjigjet akuzave të ngritura ndaj tij.
“Do të vij në OKB. Do të them të vërtetën për ushtarët tanë heroikë. Dhe do të them të vërtetën për ty”, deklaroi kryeministri izraelit.
Netanyahu pritet t’i drejtohet Asamblesë së Përgjithshme të OKB-së të enjten, në një klimë të tensionuar ndërkombëtare, ku lufta në Gaza dhe kritikat ndaj Izraelit pritet të jenë ndër temat kryesore të debatit.
