Tre luanesha kanë ngordhur në Kopshtin Zoologjik Tama, në periferi të Tokios, pasi dyshohet se u goditën nga vala ekstreme e të nxehtit që përfshiu Japoninë gjatë javëve të fundit. Autoritetet japoneze thanë se është hera e parë në 62 vitet e historisë së këtij kopshti zoologjik që humbin jetën luanë për shkaqe të lidhura me temperaturat e larta.
Luaneshat, të moshës 3, 11 dhe 15 vjeç, ngordhën mes datave 28 korrik dhe 2 gusht. Autopsitë zbuluan se të treja kishin pësuar dehidrim të rëndë dhe insuficiencë të shumëfishtë të organeve, ndërsa shkaku përfundimtar i vdekjes pritet të konfirmohet pas analizave laboratorike.
Sipas drejtuesve të kopshtit zoologjik, në mesin e korrikut temperaturat në Tokio arritën pothuajse 39 gradë Celsius. Shumica e 16 luanëve të parkut humbën oreksin dhe u bënë apatikë, ndërsa disa prej tyre nuk arrinin më të ngriheshin në këmbë ose humbën ndjenjat. Një pjesë u rikuperuan pas trajtimit, por tre luaneshat nuk arritën të mbijetonin.
Ekspertët shpjegojnë se, megjithëse luanët jetojnë në Afrikë, ata janë të përshtatur me klimën e thatë, ndërsa kombinimi i temperaturave shumë të larta me lagështinë e madhe në Tokio e bën shumë më të vështirë rregullimin e temperaturës së trupit.
Pas ngjarjes, kopshti zoologjik ka pezulluar ekspozimin e luanëve për vizitorët dhe ka shtuar masat mbrojtëse, përfshirë spërkatjen me ujë, ventilimin shtesë dhe trajtimin me serum për kafshët që vijojnë të shfaqin shenja dobësie.
