Komiteti Gjyqësor i Senatit amerikan ka miratuar me 12 vota pro dhe 10 kundër emërimin e Todd Blanche si Prokurorin e Përgjithshëm të ardhshëm të Shteteve të Bashkuara, duke i hapur rrugën votimit përfundimtar në Senatin e plotë.
Blanche, ish-avokat personal i presidentit Donald Trump dhe aktualisht Prokuror i Përgjithshëm në detyrë, ka hasur në kundërshtimin e demokratëve, të cilët kanë shprehur shqetësime për pavarësinë e Departamentit të Drejtësisë nëse ai konfirmohet në detyrë.
Senatori Chris Coons, demokrati më i lartë në Komitetin Gjyqësor, deklaroi para votimit se qytetarët amerikanë meritojnë një Departament Drejtësie të pavarur dhe transparent.
"Unë nuk besoj se Blanche mund ose dëshiron ta përmbushë këtë standard", u shpreh Coons.
Edhe senatori Adam Schiff u bëri thirrje kolegëve të tij të votojnë kundër kandidaturës, duke paralajmëruar se përdorimi i postit të Prokurorit të Përgjithshëm për të ndjekur kundërshtarët politikë do të minonte sundimin e ligjit dhe do të krijonte një precedent të rrezikshëm për institucionet amerikane.
Pavarësisht kritikave, miratimi në komision e afron Todd Blanche një hap më pranë konfirmimit zyrtar nga Senati i SHBA-së.
