Një incident i rëndë është regjistruar në Ngushticën e Hormuzit, ku anija e ngarkesës së thatë Minoan Pioneer, me flamur liberian dhe interesa greke, është goditur nga një raketë e paidentifikuar. Si pasojë e sulmit, një anëtar i ekuipazhit rezulton i zhdukur, ndërsa autoritetet kanë nisur hetimet për zbardhjen e rrethanave.
Sipas raportimeve, sulmi ndodhi rreth 20 milje detare në verilindje të Khasabit, Oman, mbrëmjen e 3 gushtit. Operacionet Tregtare Detare të Mbretërisë së Bashkuar (UKMTO) konfirmuan se një anije tregtare raportoi në kanalin e emergjencës VHF se ishte goditur nga një predhë e panjohur.
Kompania e sigurisë detare Vanguard Tech identifikoi anijen si Minoan Pioneer, e menaxhuar nga Modion Maritime Management. Raketa goditi dhomën e motorëve, duke shkaktuar ndërprerje totale të energjisë dhe një zjarr në zonat e akomodimit.
Ekuipazhi arriti të luftonte flakët dhe kërkoi ndihmë nga anijet që ndodheshin në afërsi. Deri më tani rezulton i zhdukur inxhinieri i tretë i anijes, ndërsa nuk janë bërë të ditura kombësia e tij dhe rrethanat e zhdukjes. Ende nuk dihet nëse zjarri është shuar plotësisht dhe nëse anija mund të vazhdojë lundrimin.
Ngjarja vjen vetëm një ditë pas dy incidenteve të tjera me cisternat Egypt Prosperity dhe On Pride në ujërat e Omanit, duke rritur shqetësimet për sigurinë e lundrimit në Ngushticën e Hormuzit, një nga korridoret detare më strategjike në botë.
