Liderë shtetesh, ministra dhe përfaqësues nga 200 vende u mblodhën në Baku, Azerbajxhan, për një konferencë dy-ditore mbi Ndryshimet Klimatike të Kombeve të Bashkuara, ku mori pjesë edhe kryeministri shqiptar, Edi Rama.
Rama ka vendosur të kalojë përtej fjalimeve të zakonshme dhe të bëhet një lider global që sfidon të tjerët për të bërë më shumë në luftën kundër ndryshimeve klimatike. Ai nuk nguron të bëjë kritika të forta, duke i quajtur hipokrite përpjekjet e ndërkombëtare.
Sipas “The Guardian”, Rama “la pas fjalimin e tij të përgatitur mirë” dhe doli jashtë skenarit, pasi vërejti që liderët e tjerë bënin deklaratat e tyre ndërsa shfaqeshin në ekranet e heshtura, të ulur mbi kolltuqe të rehatshëm në një dhomë ngjitur në ambientet e COP29 në Baku.
“Njerëzit atje hanë, pinë, takohen dhe fotografojnë së bashku, ndërsa imazhet e liderëve pa zë luhen vazhdimisht në sfond. Për mua, kjo më duket saktësisht si ajo që ndodh në botën reale çdo ditë. Jeta vazhdon, me zakonet e saj të vjetra dhe fjalimet tona, plot fjalë të mira për luftimin e ndryshimeve klimatike, nuk ndryshojnë asgjë”, u shpreh ai.
Rama përmendi deklaratën e Sekretarit të Përgjithshëm të OKB-së nga dita e djeshme, duke theksuar se emetimet e karbonit janë rritur nga mbledhja e mëparshme e COP deri te kjo që po mbahet këto dy ditë.
“Çfarë kuptimi ka për të ardhmen e botës nëse ndotësit më të mëdhenj vazhdojnë në të njëjtën mënyrë?” pyeti Rama. “Çfarë mund të arrijmë në këtë takim, pa pushim, nëse nuk ka një vullnet të përbashkët politik që të shkojmë përtej fjalëve dhe të bashkohemi për veprime të vërteta?”
