Ish-ministri i Shëndetësisë, Ilir Beqja, është paraqitur sot në Kryesinë e Kuvendit për të dëshmuar në Komisionin Hetimor Parlamentar për koncesionet në Shëndetësi. Seanca e djeshme, e cila zgjati për rreth 7 orë e gjysmë, u mbyll pa dëshminë e tij, pavarësisht pranishmërisë së Beqajt gjatë gjithë kohës në ambientet e Kuvendit.
Mbledhja e komisionit për çështjen e koncesionit të “Sterilizimit” po vijon, teksa pritet që ish-ministri të japë dëshminë e tij, përpara afatit të fundit që është dita e nesërme. Ditën e djeshme, debati mes opozitës dhe mazhorancës bllokoi përparimin e komisionit. Shkak për përplasjet u bë kërkesa e Beqajt për të dhënë dëshminë e tij të shoqëruar me një prezantim vizual, gjë që u refuzua nga kryetarja e komisionit, Albana Vokshi, dhe anëtarët e opozitës, duke argumentuar se kjo nuk lejohet. Nga ana tjetër, mazhoranca deklaroi se prezantimi nuk do të pengonte procesin.
Beqja pritet të sqarojë dy koncesionet kryesore që kanë ngritur shqetësime: atë të sterilizimit dhe të check up-it. Ish-ministri është gjithashtu nën hetim nga SPAK lidhur me këto çështje, përfshirë akuzat për abuzim me fondet publike. Të hënën, biznesmeni Ilir Rrapaj dëshmoi për 5 orë në komision, ndërsa ishte nën masa sigurie me pranga, dhe mohoi lidhjet personale me Beqajn dhe ish-zv. ministrin Klodjan Rjepaj.
