Një tërmet i fuqishëm me magnitudë 6.8 ballë, sipas CENC, dhe 7.1 ballë, sipas Shërbimit Gjeologjik të SHBA, goditi rajonin e Tibetit herët në mëngjes. Lëkundjet ndodhën në orën 09:05 (ora lokale) dhe u ndjenë deri në kryeqytetin e Nepalit, Katmandu.
Sipas autoriteteve kineze, të paktën 95 persona kanë humbur jetën dhe 130 të tjerë janë plagosur, ndërsa shumë ndërtesa janë shembur. Rajoni më i prekur është kantoni Dingri, ku epiqendra ndodhej rreth 370 kilometra nga kryeqyteti rajonal, Lhasa.
Pamjet nga qyteti Latche tregojnë mbeturina të shpërndara përpara restoranteve dhe ndërtesa të dëmtuara rëndë. Ekipet e shpëtimit kanë mbërritur në zonat më të goditura për të vlerësuar dëmet dhe për të ndihmuar të prekurit.
Transmetuesi shtetëror CCTV raportoi për dëme të shumta në zonat pranë epiqendrës, ndërsa autoritetet po vijojnë përpjekjet për të shpëtuar ata që mund të jenë bllokuar nën rrënoja. Situata mbetet kritike dhe bilanci mund të përkeqësohet më tej.
